Куорат кыыһа тыа сирин сайыннарар

Ааптар: 
Бөлөххө киир:

Мин бүгүн кэпсиир ыччатым бэйэтин иннигэр туруоруммут ситиһиэхтээх сыала-соруга дьэҥкэ —  кини үөрэтэр оҕолорун сырдыкка, үйэлээххэ уһуйан, киэҥ көҕүстээх оҥоруу, олоххо тардыһыытын күүһүрдүү.

edersaas.ru


 2011 сыллаахха омук тылыгар үөрэнэн тылбаасчыт идэтин ылбыт Майя кыыска бары барыта сырдык, кэрэ курдуга. Онуоха эбии алта ый устата Америкаҕа бэйэтигэр практикатын барбыт буолан, санаатыгар ханна санаата да, үлэ булара чэпчэки буолуохтааҕа.

Америкаттан кэлээт, кыыс биир улахан тэрилтэҕэ үлэ булбута. Куорат оҕото ийэтин дойдутугар Мэҥэ Хаҥалас Өлөчөйүгэр эбэлээх эһэтин көрсө таарыйа, тыаҕа сынньана түһэн кэлэргэ санаммыта. Тиийэн оҕо сааһын доҕотторун көрсөн, тыа сиригэр дууһалыын сынньана сылдьан, орто оскуолаҕа англия тылын үөрэтэр учуутал суоҕун истибитэ. Сотору буолан баран, киниэхэ оскуола салалтата учууталынан үлэлииргэ этии киллэрбитин, быһа гыммакка, сөбүлэммитэ. Филадельфияҕа практикатын барбыт английскай тыл үөрэҕэр үөрэммит учуутал тыа оскуолатыгар үлэлиирэ —Таҥара бэлэҕэр тэҥнээх буоллаҕа.

Оскуолаҕа үлэлиирбин наһаа сөбүлээбитим. Ол кыһын ахсынньыга аармыйаттан кэлбит Дима Билюкинныын билсибитим. Эдэр саас умнуллубат тапталыгар куустарбытым. Дьиҥнээх тапталы көрсүү үөһэттэн айдарыы диэн кэпсииллэрэ кырдык да эбит! Устудьуоннуу сылдьан табаарыстаһар да буоллахпына, тапталлара диэн бу дуо дии саныырым. Оттон Димаҕа сыһыаным олох атын этэ. Мин ол дьикти иэйиигэ куустарар кэммэр кэргэн тахсыам дуу, тахсымыам дуу дии санаабат этим. Кини — мин аналым! — диэн тута өйдөөбүтүм. Онон тапталларын көрсө илик кыргыттарга эһиги аналгыт син биир баар, эрэнэ күүтүҥ диэн сүбэлиэм этэ, — диэн кэпсиир Майя.

2012 сыл сайыныгар Билюкиннар диэн эдэр ыал Өлөчөй сис ыалын кэккэтин хаҥатар аналланан унаар буруону оттубуттара.

Өлөчөйгө олорор дьиэ суох буолан, дьоммутугар олорбуппут. Мин санаабар, тыа сиригэр ыччат олохсуйбат төрүөтүнэн олорор дьиэ суоҕа буолар. Ол иһин, төһө да дойдуларыгар төннөн үлэлиэхтэрин баҕарбыттарын иһин, куоракка хааларга күһэллэллэр, ыал буолбаттар. Уолбун оҕолонон баран, алтыс ыйыгар куоракка көһөн кэлбиппит. Манна мин дьиэлээхпин. Тута 26-с оскуолаҕа үлэ булбутум. Кэргэним Дима бэтэринээр идэлээх. Кини үлэ булбакка, уолун кытта олорбута. Тыа сирин киһитэ буолан, өрүү дойдутун саныыра. Мин эмиэ, төһө да куорат оҕото буолларбын, Өлөчөйү уонна оскуолабын эмиэ ахтарым. Онтон сүбэлэһэн баран, дойдубутугар төттөрү көһөн кэлбиппит. Оскуолам кэлэктиибэ миигин үөрэ көрсүбүтэ. Мин кынаттана түспүттүү, оҕолорбун кытта сонун сүүрээннэри олоххо килэрбитинэн барбыппыт«, — диэн кэпсиир Майя Билюкина.

Өлөчөй орто оскуолатыгар «Алтан кэскилэ» диэн оҕо тэрилтэтэ оскуола оҕолорун түмэн үлэлэтэр. Манна бастакы кылаастан уон биирискэ диэри үөрэнэр оҕолор төрөөбүт дойдуларын туһугар анаммыт хас да хайысхалаах уопсастыбаннай үлэни ыыталлар.

Биһиги оҕо эрдэхпитинэ ханнык да түмэр тэрилтэ суоҕа. Билэрбит эрэ оскуола уонна дьиэ этэ. Онон оҕо кыра эрдэҕиттэн: «Бу мин төрүт дойдум, бииргэ үөрэнэр доҕотторум, мин төрөөбүт Өлөчөйүм туһугар» диэн санаалаах, сыаллаах-соруктаах улааттаҕына, олоххо толору бэлэмнээх буолуоҕа дии саныыбын, — диэн санаатын үллэстэр эдэр учуутал.

Майя устудьуоннуу сылдьан КВН хапытаана буола сылдьыбыт. Нэһилиэгэр актыбыыс лиидэр быһыытынан тарбахха баттанар. Өлөчөй кэскилин туһугар тыа сирин олоҕун хамсата сылдьар ыччакка тахсыылаах үлэтигэр ситиһиини баҕарабыт.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0