Аныгы үйэҕэ дьон үксэ көмпүүтэргэ бүк түһэн олорон үлэлиир. Киэһээтин дьиэҕэ дэлби сылайан тиийэҕин, өссө эбиитин сүнньүҥ, көхсүҥ, сиһиҥ ыалдьар. «Уруучукаттан ыараханы көтөхпөккө олорон, ол тугу гынан сылайаҕыный?” — диэн сөҕөн ыйыталлар. Оттон сыл-хонук ааһан истэҕин аайы, хонтуораҕа олорон үлэлиир дьону хондуруос «буулуур».
Үрүҥ халааттаах эмчиттэр этэллэринэн, хамсаммат киһи хаанын эргиирэ бытаарар, хойдор, араас ыарыыга тиэрдэр. Онон кыратык да буоллар, эти-сиини эрчийэр хайаан да наада.
40 тахса сыл ЛФК (эмтиир физическэй култуура) бырааһынан үлэлээбит Федот Максимов Дьокуускай куоракка «Кыайыы 50 сыла» успуорт дыбарыаһыгар, оптуорунньукка уонна бээтинсэҕэ дьарык тэрийэн ыытар. Ааспыт сырыыга 44 киһи сырытта, үгүстэр хаһыс да сылларын сөбүлээн дьарыктаналлар. «Сүнньүбүт көһүйбүтэ, хондуруоспут хам ылан ыалдьара, көхсүбүт, сиспит аанньа хамнаппат буолбута манна кэлиэхпититтэн чэпчээн, эрчиллиибит туһата улахан», — дэһэллэр дьахталлар.
«Ханна да сырыттарбын, куоракка, улууска дьону түмэ тардан, эти-сиини чэбдигирдэргэ, ордук сааһырбыт дьоҥҥо сөп түбэһэр эрчиллиини талан ылан дьарыктыыбын. Үгүстэр систэрин тоноҕоһо, сүнньүлэрэ, тобуктара, илиилэрин-атахтарын сүһүөхтэрэ ыалдьар, ону көрөн эрчийэбит.
Аҕам саастаах дьон оскуолатын нөҥүө үлэлиибит. Онон төлөбүрэ да удамыр, биир киһиттэн 50 солкуобай. Кыһыҥҥы халтарааҥҥа охтоннор, кырдьаҕастар илиилэрин-атахтарын эчэтэллэр, ол оһон биэрбэт, дьарҕа буолан нүөлүйэн ыалдьар. Ол иһин тустаах сүһүөхтэри сылытан, имитэн биэрэргэ, халтарыйан охтон иһэн кумуччу туттан, дугунан, улаханнык эчэйбэттэрин туһугар үөрэтэбин. Эдэрдэр биирдиилээн кэлээччилэр. Кинилэр күнү супту хонтуораҕа лигиччи олорон, мастыйан хаалаллар, онон имигэс буоларга араас эрчиллии оҥоробут», — диэн кэпсиир СӨ Доруобуйа харыстабылын туйгуна, киһини чөлүгэр түһэрэр, эмтиир физкультура инструктора Федот Максимов.
Марианна Тыртыкова, «Саха сирэ» хаһыат, edersaas.ru