Коронавирус инфекцията тарҕанар куттала үөскээн, Дьокуускайдааҕы килиниичэскэй балыыһа провизорнай отделениеланна. Манна коронавирустаабыт дьону кытары хантаактаспыттар уонна ыалдьар кутталлаахтар эмтэнэллэр.
edersaas.ru
Ол туһунан килиниичэскэй балыыһа кылаабынай бырааһа Николай Васильев маннык кэпсээтэ:
- —Балыыһа икки куорпуһугар: үһүс уонна төрдүс куорпустарга тустаах сыҕарыйсыы барда. 3 №-дээх куорпуска пневмониялаах итиэннэ коронавирус инфекциялаах дьоҥҥо 50 куойкалаах отделениены бэлэмнээтибит. Өрөспүүбүлүкэ Доруобуйа харыстабылын министиэристибэтэ биһиэхэ тыҥа искусственнай вентиляциятын- аҕыс аппараатын биэрдэ.
Инфекция көрдүгэнигэр үлэлии сылдьар эмчиттэрбитигэр өй-санаа уонна уйулҕа өттүнэн ноҕуруускалара хаһааҥҥытааҕар да улаатта. Онон, балыыһа салалтата исписэлиистэр куттала суох усулуобуйаҕа үлэлииллэригэр туох кыалларын барытын оҥорорго кыһаллар. Эмчиттэр харыстанар сириэстибэлэринэн хааччылыннылар. Сыстыганнаах ыарыылар балыыһаларыгар дьуһуурунайдыыр эмчиттэргэ балыыһа суотугар итии аһылык бэриллэр, психологтар үлэлииллэр. 55 үлэһит дьуһуурустуба кэнниттэн дьиэ кэргэнин кытары алтыспаттарын курдук, туспа сиргэ олоруоҕа. Күүстээх эрэһииминэн үлэлиир 4 киһи оҕотугар Дьокуускай куорат дьаһалтата “Искорка” оҕо саадыгар миэстэ биэрдэ. Үлэһиттэр хамнастара кэмигэр уонна толору төлөнөр.
Оттон Перинатальнай киин кылаабынай бырааһын акушер-гинекология чааһыгар солбуйааччы Данара Донская иһитиннэрбитинэн, акушер-гинеколог көмөтүгэр наадыйар эмтэнээччилэргэ тустаах көмө барыта оҥоһуллар. Инфекцияҕа сыстыыны таһаарбат туһугар кэккэ дьаһаллар ылыллыбыттар. ОРВИ сибикилээх уонна коронавирустаах дьону кытары хантаактаах дьахталларга изолятордар бааллар, тастан аҕалар аһылыктары тутууну тохтоттулар, ол оннугар ийэ буолуохтаах дьахталларга битэмииннээх аһылык күүһүрдүлүннэ.
Надежда ЕГОРОВА, «Саха сирэ» хаһыат, edersaas.ru