Сэтинньи 1 күнүгэр, бээтинсэҕэ култуура уонна искусство Арктикатааҕы судаарыстыбаннай института оскуола үөрэнээччилэрин, төрөппүттэри, биирдиилээн дьону сыллата ыытыллар Аһаҕас аан күннэригэр ыҥырар.
Биллэрин курдук, олунньу 1 күнүгэр диэри оскуоланы бүтэрэр оҕолор биир кэлим эксээмэҥҥэ ханнык биридимиэттэри талалларын иһитиннэриэхтээхтэр, сайаапкаларын биэриэхтээхтэр. Ол иннинэ ханнык идэни баһылыахтарын баҕаралларын чопчу быһаарыммыт буолуохтаахтар. Кинилэр ханнык эксээмэни талаллара онтон быһаччы тутулуктаах. Дьэ, ол иһин үөрэх кыһалара идэни талыыга туһаайыллыбыт араас тэрээһиннэри ыыталлар.
Сарсын, сэтинньи 1 күнүгэр, култуура уонна искусство Арктикатааҕы судаарыстыбаннай института Аһаҕас аан күннэрин тэрийэр. Манна кэлбит дьоҥҥо анаан институкка экскурсия ыытыахтара, устудьуоннар уонна преподавателлэр уус-уран сонун үлэлэринэн быыстапка-дьаарбаҥка тэриллиэҕэ, дьарыктар (ырыа, сыанаҕа хамсаныы, сыанаҕа саҥарыы-иҥэрии, хомуска оонньооһун, тардыы, аныгы үҥкүү) хайдах баралларын быһа тардан көрдөрүөхтэрэ, актер маастарыстыбатыгар психо-физическэй тренинг, ону таһынан, кумааҕынан оҥоһуктарга, үҥкүүгэ итиэннэ норуот муусукаҕа инструменнарыгар маастар-кылаастар буолуохтара. Кэлиҥ, көрүҥ, истиҥ.
Буолар сирэ: Дьокуускай куорат, Орджоникидзе уул., 4-с нүөмэрдээх дьиэтэ (култуура уонна искусство Арктикатааҕы судаарыстыбаннай института)
Бириэмэтэ:
Экскурсия — 11:00 ч.,
Маастар-кылаастар — 12:00 ч. (аныгы үҥкүү, норуот инструменнара, актер маастарыстыбатыгар психо-физическэй тренинг) уонна 14:00 ч. (кумааҕынан оҥоһуктар, хамаанданы тэрийиигэ тренинг).
Людмила ПОПОВА, “Саха сирэ” хаһыат, edersaas.ru