Бүгүн – Култуура үлэһитин күнэ.
Бу ый саҥатыгар Чурапчы улууһун «Айылгы» Норуот айымньытын дьиэтигэр култуура, искусство эйгэтин үлэһиттэрэ тоҕуоруһа мустубуттара. Онуоха икки тэрээһин үтүө төрүөтүнэн буолла. Ол курдук, сарсыарда өттүтүгэр улуустааҕы биир идэлээх сойуус отчуоттуур-быыбардыыр кэмпириэнсийэтэ, оттон эбиэт кэннэ үгэс буолбут сыллата ыытыллар «Чолбон» бириэмийэни туттарыы сиэрэ-туома ыытыллыбыта.
Кэмпириэнсийэҕэ сүрүн дакылааты идэлээх сойуус бэрэссэдээтэлэ Айталина Смирникова оӊорбута. Кини, куоластааһын түмүгүнэн, профсоюз бэрэссэдээтэлинэн хаттаан талылынна.
Оттон «Чолбон» бириэмийэни туттарыы сиэрэ-туома биһиги эйгэбитигэр быйыл алтыс төгүлүн ыытылынна. Сыллата тэрээһиммитигэр Чурапчы улууһун баһылыга Андрей Ноговицын кыттыыны ылан эҕэрдэ тыл этэр, инники соруктары туруорар, ситиһиилээх үлэһиттэри наҕараадалыыр. Маны тэӊэ, Чурапчы улууһун култуураҕа салаатын салайааччыта Дмитрий Попов истиҥ эҕэрдэтин тиэртэ уонна сыл түмүгүнэн биир идэлээхтэригэр Бочуотунай грамотаны, Махтал суруктары туттарда. Биир улахан наҕарааданан Чурапчытааҕы кииннэммит библиотечнай ситим кылаабынай библиотекара Надежда Аммосоваҕа «СӨ култууратын туйгуна» аат иӊэриллибитэ буолла.
«Чолбон» бириэмийэ 11 хайысханан бэйэтин хаһаайыттарын булла: «Имя культуры» аат өр сыл устата мусуойга, «Ай» норуодунай устуудьуйаҕа үлэлээбит ытыктыыр бэтэрээммитигэр Валентина ПИНИГИНАҔА, «Лучший руководитель учреждения культуры» аат 2019 сыл түмүгүнэн бастыӊ көрдөрүүлээх Хадаардааҕы «Тускул» Норуот айымньытын дьиэтин дириэктэригэр Ирина ТАРАСОВАҔА, «Лучший художественный руководитель» аат Чыаппаратааҕы «Ырыа» Норуот айымньытын дьиэтин уус-уран салайааччытыгар Светлана БОРИСОВАҔА, «Народное творчество» аат Р.А.Филиппов аатынан Чакырдааҕы фольклор дьиэтин исписэлииһигэр, фольклорнай кэлэктииптэр салайааччыларыгар Сахайа КАРАТАЕВАҔА, «Декоративно-прикладное творчество» аат Төлөйдөөҕү «Аартык» Норуот айымньытын дьиэтин түмсүүтүн салайааччытыгар Наталья ГУЛЯЕВАҔА, «Лучший преподаватель ДШИ» ааты А.П.Гоголев аатынан Чурапчытааҕы искусство оскуолатын уруһуйга преподавателэ Катерина ЗАХАРОВАҔА уонна А.В.Посельская аатынан Дириӊнээҕи искусство оскуолатын уруһуйга преподавателэ Туйаара ИВАНОВАҔА, «Лучший библиотекарь» аат Хадаар нэһилиэгин библиотекарыгар Лена НОГОВИЦЫНАҔА, «Лучший профсоюзный лидер» аат «Айылгы» Норуот айымньытын дьиэтин үлэһитигэр Константин ЛЫТКИӉӉА туттарылынна. «Чолбон» бириэмийэни култуура эйгэтигэр киллэрэр кылаатын сыаналаан туран нэһилиэк баһылыктарыгар сыллата туттарабыт, быйыл бириэмийэни «Соловьев нэһилиэгэ» МТ баһылыга Мария КРОННИКОВА ылыан ылла.
Бу курдук, ааспыт сыл ситиһиитэ саӊа кыайыыга-хотууга сирдээтин диэн туран өрөспүүбүлүкэ култуура, искусство эйгэтигэр айымньылаахтык үлэлии-хамсыы сылдьар биир идэлээхтэрбитин эйэҕэстик эҕэрдэлиибит!
Мария ВАСИЛЬЕВА.