Соторутааҕыта социальнай ситимнэринэн Өймөкөөн улууһун Сордоҥноох уонна Томтор нэһилиэктэрин сибээстиир Куйдуһун муостата эмиэ алдьаммытын туһунан хаартыскаҕа түһэрэн ыытан суруйбуттара.
edersaas.ru
Суолу оҥорооччулар былааннаах өрөмүөнү ыыппыттарын түмүгэр сырыы олохтонно эрээри, кыһалҕа син биир сотору-сотору баарын биллэрэр.
Маныаха туох үлэ ыытылларын улуус баһылыга Иннокентий Сивцев маннык быһаарар:
— Куйдуһун үрэҕи туоруур муоста эргэрэн, улахан ардахха биэрэги кытта холбонор тирэҕин уу суурайан, сууйан кэбиһэр буолан сырыыны атахтыыр.
Бу боппуруос сүүрбэччэ сыл устата быһаарыыга турар да, кыаллыбат өрүтэ үгүс. Ол онтон, бастатан туран, үбүлээһинэ кыаллыбат.
Дьиҥэр, бу муоста оннугар саҥа тимир муоста тутуллуон сөптөөх да, ыарахан сыаналаах тутуу буолан, кыаллыбат. Онон муостаны саҥардар боппуруоһу СӨ Тырааныспарга уонна суол хаһаайыстыбатын министиэристибэтин таһымыгар туруорустубут.
СӨ Айан суолугар управлениетын салалтата бырыайыактыыр сметалыыр документация оҥоһуутугар тустаах үбүлээһини тобулар боппуруоһу үөрэтэр.
Онон өр сылларга айаны-сырыыны атахтыыр Куйдуһун муостатын саҥардар боппуруос оннуттан хамсыыра буоллар диэн, олохтоохтор эрэнэ кэтэһэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Кира Курилова түһэриитэ.