“Үктэлгэ” – 17 ааптар үлэтэ

Бөлөххө киир:

Соторутааҕыта “Үктэл” диэн уус-уран хомуурунньук бастакы нүөмэрэ күн сирин көрдө. Бу таһаарыы биир уратытынан, биир улуус бэйэтин айар дьоҕурдаах дьонун өйөөн, кинилэр айымньыларын хомуурунньук гынан таһаарбыта буолар.

edersaas.ru

Ол эбэтэр, “Үктэлгэ” Уус Алдан улууһун “Мүрү саһарҕата” хаһыакка бэчээттэммит олохтоох ааптардар кэпсээннэрэ түмүллэн киирбиттэр. Кинилэр айымньыларыгар күннээҕи олох кыһалҕалара, сиэр-майгы, буола турар түгэннэр, эр киһи дьахтар сыһыаннара, таптал кистэлэҥэ, дьикти-дьиибэ түбэлтэлэр уо.д.а. уустаан-ураннаан сырдатыллыбыттар.

Киирии тылы “Мүрү саһарҕата” улуустааҕы хаһыат эппиэттиир сэкирэтээрэ, РФ Суруналыыстарын сойууһун чилиэнэ Наталья Попова суруйбут.
“2017 сылтан саҕалаан, олохтоох ааптардары өйүүр санааттан “Төлкө” диэн анал балаһа арыйан үлэлэттибит. Бу бырайыакпытын аан бастакынан олохтоох суруйааччылар Ульяна Бурнашева-Уйана, Татьяна Находкина, Иван Попов-Бахсылыырап, Николай Литвинцев, Иннокентий Сыроватскай өйөөтүлэр. Онон, кинилэргэ махталбыт муҥура суох. Хаһыат балаһаларыгар тиһигин быспакка Татьяна Кириллина-Татыйык, кини кэргэнэ Анатолий Кириллин-Толикус, Александр Попов айымньылара бэчээттэннилэр. Маны таһынан, кэпсээн жанрыгар саҥа холонор ааптардар Анна Колосова, Анна Винокурова, Мария Аргунова, Чэлгийээнэ Бахсырова кэпсээннэрэ ааҕааччы болҕомтотун тартылар. Бу үс сыл устата биһиги балаһаларбытыгар 40-ча ааптар айымньыта бэчээккэ таҕыста, оттон “Үктэл” бастакы хомуурунньугар 17 ааптар үлэтэ киирдэ”, — диэн билиһиннэрэр.
Наталья Попова бэлиэтээбитинэн, маннык хомуурунньук сыл аайы бэчээттэнэр буолуоҕа. Бу сотору номнуо “Үктэл” иккис нүөмэрэ күн сирин көрөрө былааннанар. Саҥа ааптардары эрэдээксийэни кытта билсэргэ, бииргэ үлэлэһэргэ ыҥыраллар.

Уус алданнар сонун таһаарыылара  атын улуустар бэйэлэрин айар куттаах дьоннорун өйүүллэригэр, киэҥ араҥаҕа таһааралларыгар үтүө холобур буолара саарбаҕа суох.

Хомуурунньук “Мүрү саһарҕата” айар-полиграфическай холбоһукка бэчээттэммит.

Надежда ЕГОРОВА, “Саха сирэ”, edersaas

+1
0
+1
0
+1
0
+1
0
+1
0
+1
0
+1
0