Кыһыҥҥы суолу 15-20 күнүнэн эрдэ арыйаары гыналлар

Ааптар: 
Бөлөххө киир:

Ахсынньы 7 күнүгэр СӨ бырабыыталыстыбатын бэрэссэдээтэлин солбуйааччы Алексей Колодезников СӨ таһаҕаһы  таһар биэдэмистибэлэр икки ардыларынааҕы таһаҕас таһар хамыыһыйа мунньаҕын ыытта. Мунньахха кыһыҥҥы суоллары 15-20 күнүнэн эрдэ арыйыахха сөп диэн эттэ.

Өрөспүүбүлүкэҕэ мууһунан суоллары үлэҕэ киллэрэргэ бэлэмнээһин туһунан СӨ тырааныспарын уонна суол хаһаайыстыбатын миниистирин бастакы солбуйааччы Сергей Владимиров сырдатта. Быйыл суолу оҥорорго халлаан тымныыта табыгастаах буолан, саҥа дьылга диэри хотугу уонна Арктика улуустарыгар мууһунан суол барыта арыллыан сөбүн бигэргэттэ. Бастаан 10-20 туонна ыйааһыннаах массыыналар сылдьаллара көҥүллэниэ диэтэ.

«Бүлүү» федеральнай трассаҕа мууһунан суолларга 4 туоннаҕа диэри ыйааһыннаах массыыналар айанныыллара көҥүллэммит. 10 туонна ыйааһыннаах массыыналар сырыылара ахсынньы 15 күнүттэн көҥүллэниэҕэ. «Даркылаах-Аллараа Бэстээх» суол 2019 сыл тохсунньутуттан арыллара күүтүллэр. «Халыма» федеральнай трассаҕа ахсынньы 3 күнүттэн 5 туонналаах массыыналар сырыылара көҥүллэммитэ. Ахсынньы 14 күнүттэн, 10 туонналаах массыыналар сырыылара көҥүллэниэҕэ. «Хатас-Павловскай» суолунан 5 туонналаах массыыналар сырыылара көҥүллэммитэ. Сергей Владимиров этэринэн, бүгүн онно анал хамыыһыйа үлэлии сылдьар. Хамыыһыйа көҥүллээтэҕинэ, сарсыҥҥыттан 10 туонналаах массыыналар сылдьан саҕалыахтара.

Дьон олоҕор-дьаһаҕар наадалаах таһаҕастары оройуоннарга тиэрдии туһунан СӨ Нэһилиэнньэ куттала суох буолуутун судаарыстыбаннай кэмитиэтин бэрэссэдээтэлэ Дмитрий Лепчиков иһитиннэрдэ. 2018 сыллааҕы былаанынан, оройуоннарга 637,5 тыһ. туонна дьон олоҕор-дьаһаҕар наадалаах таһаҕастары массыынанан тиэрдиллиэхтээх. Бүгүҥҥү күҥҥэ 99 тыһ. туонна тиэрдиллибит, ол аата сыллааҕы былаан 15%-на туолбут. ОДьКХ 537,5 тыһ.туонна уматыгы тиэрдиэхтээҕиттэн 81,6 тыһ.туоннаны тиэрдибит. «Сахаэнерго» хампаанньа 50,5 тыһ. туонна былааныттан 17 тыһ. туоннаны тиэртэ. «Теплоэнергосервис» 18 тыһ. туонна былааныттан, бүгүҥҥү күҥҥэ 600 туоннаны  тиэрдибит.

Мунньах түмүгэр Алексей Колодезников кыһыҥҥы суоллар турдахтарына, таһаҕаһы тиэйиини тута саҕалааҥ диэн сорудахтаата. Улахан болҕомтону Аллайыаха уонна Булуҥ улуустарын мууһунан суолларыгар ууруҥ диэтэ.

СӨ бырабыыталыстыбатын уонна Ил Дарханын пресс-сулууспата.

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0