Бүгүн, ыам ыйын 27 күнүгэр, Ил Дархан Айсен Николаев Ил Түмэн 17-с уочарата суох пленарнай мунньаҕар 2019 сылга судаарыстыбаннай былаас ситэриилээх уорганнарын үлэтин-хамнаһын туһунан отчуоттаата.
Ил Түмэн дьокутаата Павел Ксенофонтов отчуот туһунан бэйэтин санаатын үллэһиннэ:
— Ил Түмэн уочарата суох 17-с пленарнай мунньаҕар бүгүн Ил Дархан Айсен Николаев отчуотун иһиттибит. Куруук буоларын курдук, Айсен Сергеевич сыыппара өттүгэр чуолкай.
Олохтоох каадыры, ыччаты бырамыысыланнаска үлэлэтэр туһунан эттэххэ, биһиги бэйэбит каадырдарбытыгар электрик, слесарь, гаас ситимин үлэтигэр бэлэмниибит. Ол эрээри, сорох улахан хампаанньаларга биһиги үөрэттэрбит дьоммут идэлэрэ эппиэттэспэт.
Ол иһин Ил Дархан салгыы ыччаты бырамыысыланнаска сыһыарар туһуттан, улахан хампаанньалар баазаларыгар бэлэмниэхпит диэтэ. Бу хайысханан бардахпытына, олохтоох дьоммут үлэҕэ киирэллэрэ элбиир. Сүрүннээн, бу хампаанньалары кытта уһун болдьохтоох дуогабар түһэрсэр наада.
Айсен Николаев пандемия кэнниттэн салгыы дьоммут бу тэрилтэлэргэ үлэлии хаалыахтаахтар диэтэ. Маны сэргэ кини 2019 сылга 8000 киһини үлэ миэстэтигэр олохтообут буоллахпытына, аны 4-5 сыл иһигэр бу сыыппара улаатарын ситиһиэхтээхпитин бэлиэтээтэ.
Ульяна Захарова, edersaas.ru