Соторутааҕыта Красноярскай куоракка хотугу аҕыйах ахсааннаах норуоттар уус-уран оҥоһуктарын искусствотын бастакы сэминээрэ буолан ааста. Тэрээһин Красноярскай кыраай бырабыыталыстыбатын иһинэн үлэлиир Хотугу эргимтэни сайыннарар уонна аҕыйах ахсааннаах төрүт норуоттары өйүүр агентство итиэннэ “Мир возможностей” үөрэҕи, култуураны, спорду сайыннарар аһымал фонда көҕүлээһиннэринэн барда.
“Саха сирэ” хаһыат, edersaas.ru
Үс күн устата Таймыр, Эвенкия, Туруханскай оройуон эбэҥки, долган, нганасан талааннаах маастардара кытыннылар. Саха Өрөспүүбүлүкэтиттэн П.П. Романов аатынан Дьокуускайдааҕы ойуулуур-дьүһүннүүр искусство училищетын (кэллиэһин) преподавателлэрэ Надежда Корнилова, Агафья Барахова сырыттылар.
Сэминээр аһыллыытыгар Красноярскай кыраай бырабыыталыстыбатын бэрэссэдээтэлин солбуйааччы Анатолий Цыкалов хотугу норуоттар декоративнай-прикладной искусстволарын сайыннарыы өбүгэлэртэн бэриллибит төрүт култуураны оннунан хаалларар кыаҕы үөскэтэр, олохтоох нэһилиэнньэни үлэнэн хааччыйар, ону тэҥэ үгэскэ олоҕурбут сувенирдары, оҥоһуктары оҥорор кыаҕы үөскэтэр диэн бэлиэтээтэ.
Сэминээргэ таба тириититтэн оҥоһуктары, түүттэн мозаика, оҕуруонан тиһии, муостан скульптурнай миниатюра, мастан уонна туостан бирдимиэттэри көрдөрдүлэр.
Биһиги дэлэгээссийэбит сэминээр кыттыылаахтарыгар декоративнай-прикладной искусство икки көрүҥүнэн Дьокуускайдааҕы уус-уран училище устудьуоннара муостан кыспыт, туостан тикпит үлэлэрин көрдөрдө.
Үлэлэрин билиһиннэрдилэр уонна туостан харысхалы оҥорууга, таба муоһуттан композицияҕа маастар-кылаас биэрдилэр. Тэрээһин иитинэн, биһиги өрөспүүбүлүкэбитигэр эдэр талааннаах маастардары көҕүлээн, норуот үгэстэрэ көлүөнэттэн көлүөнэҕэ бэриллиитин уус-уран искусствотын кэпсээтилэр.
Сэминээр кыттыылаахтара хотугу сиргэ аныгы кэмҥэ норуот уус-уран айымньытыттан дьон ордук муостан кыһыыны сэҥээрэрин, биһириирин бэлиэтииллэр. Муосчуттар сүрүннээн хотугу кыыллары – табаны, мамоны, о.д.а. оҥороллорун этэллэр. Искусство өссө биир көрүҥүнэн быыспака уонна оҕуруонан киэргэтиллибит оҥоһуктар буолаллар. Күннээҕи туттар тэриллэрин, таҥастарын-саптарын быыспаканан киэргэтэллэр.
Хотугу аҕыйах ахсааннаах норуоттар уус-уран искусстволарын сэминээрэ үрдүк таһымнаахтык ааста. Бырайыагы тэрийээччилэргэ махтал! Талааннаах маастардарга инникитин даҕаны айар үлэлэригэр ситиһиилэри!
edersaas.ru саайтка анаан Надежда КОРНИЛОВА.