Бүтэһик сууккаҕа Саха сиригэр коронавируһунан ыалдьыбыт киһини бэлиэтээбэтилэр. Эрдэ ыалдьыбыт сэттэ киһи эмтэнэ сылдьар диэн Ил Дархан уонна бырабыыталыстыба пресс-сулууспата иһитиннэрэр.
Билиҥҥитэ өрөспүүбүлүкэбитигэр тас дойдулартан кэлбит гражданнар самоизоляцияҕа олороллоро коронавируһу утары охсуһууга биир көдьүүстээх ньыма буолла. Самоизоляция 14 күн устата буолар.
«Тас дойдулартан кэлбит дьон самоизоляцияҕа олороллоро булгуччу ирдэнэр. Ол аата, кинилэр бэриллибит кэм иһигэр кыбартыыраларыгар эбэтэр дьиэлэригэр соҕотох олоруохтаахтар, уулуссаҕа тахсыа суохтаахтар, атын дьону кытта хантаактаһаллара бобуллар. Маныаха обсерваторга көрдөрүнүү — саамай эрэллээх уонна табыгастаах. Тоҕо диэтэххэ, биир дьиэҕэ олорор чугас дьону харыстыахха наада«, — диэн суһал бөлөх салайааччыта, вице-премьер Ольга Балабкина иһитиннэрэр.
РФ сиригэр-уотугар бүтэһик 14 күн иһигэр тас дойдулартан кэлбит гражданнар Доруобуйа харыстабылын министиэристибэтин уонна Роспотребнадзор суһал линиятын төлөпүөннэригэр эрийэргит булгуччулаах: 8-800-100-14-03, 8-800-100-00-04.
edersaas.ru
Хаартыска — Ил Дархан уонна бырабыыталыстыба пресс-сулууспатыттан.