СӨ бырабыыталыстыбатын бэрэссэдээтэлин солбуйааччы Ольга Балабкина бүгүн өрөспүүбүлүкэҕэ коронавирус балаһыанньатын туһунан иһитиннэрии кэмигэр суукка устата 80 киһи ыарыйда диэтэ.
Инньэ гынан, дьаҥ тарҕаныаҕыттан өрөспүүбүлүкэбитигэр 1077 киһи ыарыйда, алта киһи тыына быһынна.
Күннэтэ ыалдьыбыт киһи ахсаана элбээн иһэр. Геолокация көрдөрөрүнэн, Саха сирин олохтооҕун 35 %-а хааччахтааһын эрэсиимин кэһэр диэн бүгүн тустаах биэдэмистибэ иһитиннэрдэ.
Дьокуускайга ааспыт сууккаҕа 47 киһи дьаҥҥа сутуллубута биллэр. Ол эрээри, куорат олохтоохторо дьиэҕэ хааччахтанан олорорго ыксаабаттар. Кутталлаах ыарыыны улахаҥҥа уурбат дьон болуоссаттарынан, уулуссаларынан маассабайдык күүлэйдиир. Социальнай ситимнэринэн көрдөххө, куорат таһыгар шашлыктыыр, аймахтарынан дьаарбайар дьон даҕаны ахсаана элбэх.
Өссө төгүл бэлиэтээн суруйабыт: ааспыт сууккаҕа ыалдьыбыт 80 киһи хантаактаспыт киһитэ өссө элбэх буоллаҕа. Онон сылыктаатахха, бу күннэргэ ыалдьыбыт дьон ахсаана өссө элбиирэ буолуо диэн сабаҕалааһыннар бааллар.
Маннык сырыылары тохтотуҥ! Маасканы, бэрчээккэни кэтиҥ! Эрэсиими тутуһуҥ!
Ыарыы хайдах бэриллэрий?
Инфекция ыарыһах киһи ытырдар, сөтөллөр кэмигэр бэриллэр. Ыалдьа сылдьар киһи туппут аан тутааҕыттан, көмпүүтэр, төлөпүөн уонна атын гаджеттартан, илиинэн дорооболоһор, уоһунан, иэдэһинэн сыллаһар кэмнэ сыстыахха сөп. Дьон кирдээх илиилэринэн муннуларын, харахтарын, сирэйдэрин таарыйан, вируһу тарҕаталлар, сысталлар.
Ыарыыттан хайдах харыстанабыт?
Коронавирустан хаарыстанар туһуттан илиигин мыылалаах уунан сууна сырыт.
— Кирдээх илиигитинэн сирэйгин, айаххын, хараххын таарыйыма. Маннык быраабылаларга кыра оҕолору эмиэ үөрэт, сэрэт.
— Элбэх киһи мустар сиригэр сылдьыма, уочараттарга атын киһиттэн 3 миэтэрэ ыраах тур.
— Мааската кэт, 2 чаас буола-буола уларыт. Маасканы туттан бүтэн баран, уурунаҕа бырах уонна илиигин мыылалаах уунан суун.
— 65 саастаах дьон төһө кыалларынан дьиэҕэ олорун, онно -манна сылдьа сатааман. Мааска кэтэргитин умнуман.
— Илиигитин уунан дорооболоһуман.
— Маасканы кэтэргэр үөһээ өттө муннугун сабыахтаах, аллараа өттө аллараа сыҥааххын сабыахтаах. Ханан да ха хайагас суох буолуохтаах.
— Дьиэни, үлэлиир сиргитин сотору-сотору салгылатыҥ.
edersaas.ru