Коронавирус төһө кутталламмытын сарсын быһаарыахтара...
Олох-дьаһах - Саха ыала

Коронавирус төһө кутталламмытын сарсын быһаарыахтара

Кытай Ухань куоратыгар вирус этиологиялаах пневмониянан (коронавирус) ыалдьыбыттара бэлиэтэннэ.

edersaas.ru

Доруобуйа харыстабылын бүтүн аан дойдутааҕы тэрилтэтэ (ВОЗ) аан дойду устун айаны уонна эргиэни хааччахтааһыҥҥа этиилэри киллэрэ илик. Ол гынан баран, Кытайга, чуолаан, Ухань куоракка, 200-тэн тахса киһи ыалдьыбытын туһунан сорох сонуну киэҥник тарҕатар сириэстибэлэр иһитиннэрдилэр. ВОЗ тохсунньу 22 күнүгэр ыксаллаах быһыы-майгы кэмитиэтин суһал мунньаҕын ыытар буолла. СӨ Роспотребнадзор управлениета иһитиннэрэринэн, кэккэ дойдулар экспертэрэ Киин Кытайга өрө турбут коронавирус кутталлааҕын бэлиэтииллэр.
Балаһыанньаны Роспотребнадзор кытаанахтык хонтуруоллуур. Санатан эттэххэ, 2003 сыллаахха коронавирустаах “атипичнай пневмония” 29 дойдуга тарҕанан, 8500-тан тахса киһи ыалдьыбыта. Арассыыйаҕа биир киһи ыалдьан баран, дьолго, эмтэнэн үтүөрбүтэ.

БЫҺААРЫЫ:
Коронавирус дьонтон ураты сибиинньэлэргэ, ынах сүөһүлэргэ, куоскаларга, тэбиэннэргэ, көтөр кутуйахтарга, кутуйахтарга уонна көтөрдөргө бэриллиэн сөп. Билигин дьоҥҥо сыстар коронавирус 6 көрүҥэ баара биллэр. Түөрт көрүҥэр ыалдьыы сибикилэрэ тымныйан ыалдьыыга маарынныыллар. Оттон икки көрүҥэр киһи тыынар уорганнара эмсэҕэлииллэр, куһаҕан түмүктээх буолуон сөп.
Сотору Кытай сүүһүнэн мөлүйүөн олохтооҕо Кытай Саҥа дьылынан хаһааҥҥытааҕар да барара-кэлэрэ, айанныыра күүтүллэр. Бу ыарыы тарҕанарыгар балаһыанньаны уустугурдуон эрэ сөп.

Надежда ЕГОРОВА, “Саха сирэ”, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

3 × 2 =