Ил Дархан Айсен Николаев кулун тутар 27 күнүгэр эпидемиологическай балаһыанньа туһунан сырдатта.
edersaas.ru
Өрөспүүбүлүкэҕэ эпидемиологическай балаһыанньа бэҕэһээҥҥиттэн уларыйбата. Коронавируһунан ыалдьыбыта бигэргэммит 14 киһи баар. Өссө биир киһи анаалыстарын Новосибирскайга ыыттылар. Ол Москва нөҥүө Великобританияттан кэлбит уолу аэропорка көрсөн, анаалыс ылан, тута балыыһаҕа илтилэр. Онон кини кэлээт, алтыспыт киһитэ суох. Манна Ил Дархан туһааннаах сулууспалар түргэнник, чуолкайдык үлэлээтилэр диэн бэлиэтээн эттэ.
Ыалдьыбыттары кытары хантаактаспыт дьону кэтээн көрүү үлэтэ салҕанар. 300 анаалыс бигэргэммэтэ, ол аата ыалдьыбатахтара билиннэ.
— Обсерваторга сытар, ыалдьыбыт дьон туруктара этэҥҥэ. Үс киһи сэбиргэхтэтэн (пневмония) ыарыйда эрээри, ыарыы чэпчэки көрүҥүнэн. Быраастар бары ирдэнэри оҥороллор, кэтээн көрөллөр, — диэн Айсен Сергеевич иһитиннэрдэ.
Ангелина Васильева, “Саха сирэ” хаһыат, edersaas.ru