СӨ Бырабыыталыстыбатын бэрэссэдээтэлэ Ольга Балабкина бүгүн Саха сиригэр коронавирус тарҕаныытын таһаарбат туһугар былаас дьайыытын туһунан суруналыыстар ыйытыыларыгар хоруйдаата.
edersaas.ru
Ольга Балабкина эппитинэн, коронавирус инфекцията булуллар куттала үөскээтэҕинэ, ыарыылара бигэргэтиллибит дьону эмтииргэ балыыһалар бэлэмнэр. Кытайтан уонна Вьетнамтан кэлэр рейстэргэ пассажирдары бэрэбиэркэлээһин дьаһаллара бигэргэтилиннилэр. “Якутия” авиакомпания Кытайтан кэлэр рейстэрэ тохтотулуннулар.
“Биһиги Арассыыйа тас өттүгэр кэнники 14 хонук сылдьыбыт уонна кыраадыстара үрдээбит дьону барыларын бэрэбиэркэлиибит. Кинилэр кыраадыстара үрдээбитэ билиннэҕинэ, мэдиссиинискэй тэрилтэлэргэ угуллаллар. Эмчиттэр үөрэннилэр, чопчу схемалар оҥоһулуннулар. Эрдэттэн айманыы тахсыа суохтаах”, — диэтэ Ольга Балабкина.
Аймалҕан биир төрүөтүнэн Кытайтан кэлбит 5 киһи бэҕэһээ Дьокуускай куоракка балыыһаҕа киллэриллибитин туһунан сурах буолла. Кинилэр – РФ олохтоохторо уонна коронавирус өрө турбут сиригэр сылдьыбыттар. Кинилэр ОРВИ-нан ыалдьыбыт эбэтэр гирииптээбит буолуохтарын сөп. Кинилэртэн анаалыстар үс бөлөхтөрө ылылынна. Анаалыстар Новосибирскайга “Вектор” научнай кииҥҥэ бэрэбиэркэлэнэллэр. Анаалыстарын түмүктэрэ билиннэҕинэ, ханнык балыыһаҕа эмтэнэллэрэ чопчуланыаҕа. Уопсайынан, тестэри Роспотребнадзор институттара баар субъектарыгар оҥоруохха сөп.
“Биһиги оннук институппут суох. Ол гынан баран, өрөспүүбүлүкэ баһылыгын этиитинэн, сотору аппаратура баар буоллаҕына, биһиги чинчийиини бэйэбит ыытар буолуохпут. Манна сыһыаран эттэххэ, коронавируска тест анаалыстара биэс күн иһигэр биллиэхтэрин сөп”, — диэтэ бырабыыталыстыба бэрэссэдээтэлин солбуйааччы.
Таҥара сэрэҕи таптыыр. Кытайга үөрэнэн баран, каникулларыгар кэлбит устудьуоннар билиҥҥитэ туспа дьиэҕэ кэтээн көрүүгэ сылдьаллар. Оттон Кытай устудьуоннарыгар каникулларын уһатан баран, үөрэнэллэригэр туспа график оҥоһулунна. Кытайга үөрэнэр устудьуоннар дойдуларыгар төннөн кэлиэхтэрин сөп.
«Өскөтүн коронавирус тарҕанара чахчы кутталланнаҕына, өссө атын дьаһаллар ылыллыахтара”, — диэн түмүктээтэ Ольга Балабкина.
Надежда ЕГОРОВА, “Саха сирэ”, edersaas.ru
Мария ВАСИЛЬЕВА түһэриитэ