Кыра оҕолор коронавирус дьаҥыгар наһаа ылларбаттар дииллэр. Ол да буоллар, харыстанар быраабылалары тутуһар ордук.
edersaas.ru
Оҕолору коронавирус инфекциятыттан хайдах көмүскүүр туһунан Оҕо сыстыганнаах ыарыыларын балыыһатын бастакы отделениетын сэбиэдиссэйэ, үрдүк категориялаах педиатр, инфекционист-быраас Нюргуяна Львовна Сон кэпсиир.
—Сэрэнэр, харыстанар дьаһаллар син биир гириип уонна ОРВИ курдуктар.
- Илиигитин мыылалаах уунан сууна сылдьыҥ. Кырачаан да киһи дьиэҕэ, ханна баҕарар, ону-маны таарыйара, алтыһара элбэх (аан тутаахтара, лиип кунуопкалара, оҕо былаһаакката, уопсай оонньуурдар уо.д.а.). Онон таһырдьаттан киирээт да, оҕо илиитин хайаан да мыылалаах уунан сууйуҥ;
- Төрөппүттэр, дьиэҕитигэр кэлээт да, оҕолоргутун кытары алтыһыаххыт иннинэ илиигитин, сирэйгитин мыылалаах уунан суунуҥ. Мурун хайаҕаһын мыылалаах суурадаһынынан сайҕааҥ, үчүгэйдик ыраастаныҥ, күөмэйгитин сайҕаныҥ;
- Суотабай төлөпүөҥҥүтүн, гаджеттаргытын инфекцияны бохсор суурадаһыннарынан сото сылдьыҥ. Суотабай төлөпүөннэргитин аһыыр остуолга, ас бэлэмнэнэр сиригэр уурумаҥ. Ону сэргэ, кыра оҕо хоһугар уонна кини маллара баар сиригэр эмиэ хаалларымаҥ (Тоҕо диэтэххэ, төлөпүөннэрин күнү быһа аһыыр да, туалекка барар да кэмнэригэр тута сылдьар дьон баар).
- Дьиэҕит иһин сөп буола-буола салгылатыҥ. Ордук тымныйан ыалдьыбыт киһилээх (ОРВИ) дьон дьиэҕит иһин күн аайы мыыла суурадаһыннаах уунан, инчэҕэй тирээпкэнэн сото, сууйа сылдьыҥ;
- Оҕо саамай сынньалаҥнык утуйар кэмэ 8-10 чаас буоларын умнумаҥ;
- Оҕолоргутун кэмигэр аһата уонна ууну элбэхтик иһэрдэ сылдьыҥ;
- Сибиэһэй салгыҥҥа сырытыннарыҥ (элбэх дьон сылдьар сириттэн ураты сиргэ);
- Аптекаларга антибиотиктар көҥүллүк атыыланаллар. Онон, быраас анааһына суох бэйэҕит билэргитинэн ылан эмтэммэккитигэр сүбэлиибин! Бу ыарыыны уустугурдуон сөп.
- “Саха сирэ” хаһыат, edersaas.ru саайтка анаан Зоя ИГНАТЬЕВА
+1
+1
+1
+1
+1
+1
+1