Биир суукка иһигэр 52 киһи ыалдьан, Арассыыйа үрдүнэн коронавирустаабыт киһи ахсаана 199-ка тиийдэ. 23 эрэгийиэҥҥэ саҥа ыалдьыбыт дьон бэлиэтэннэ. Дойдуга коронавирустан өлбүт киһи суох диэн бэҕэһээ кулун тутар 19 күнүгэр суһал штабка биллэрдилэр. Ол туһунан ТАСС иһитиннэрдэ.
Коронавируһунан ыалдьыбыт дьону Москваҕа, Московскай, Свердловскай, Тульскай, Тамбовскай, Воронежскай, Кировскай, Ивановскай, Рязанскай, Мурманскай, Нижегородскай, Новосибирскай, Оренбургскай, Саратовскай, Тверской уобаластарга, Красноярскай, Хабаровскай, Краснодарскай, Пермскай кыраайдарга, Саха Өрөспүүбүлүкэтигэр, Чувашияҕа, Ханты-Мансийскай уокурукка, Санкт-Петербурга буллулар.
Штабка этэллэринэн, ити дьон бүтэһик икки нэдиэлэ иһигэр коронавирус өрө турбут дойдуларыгар сылдьыбыттар. Кинилэри Арассыыйа иһигэр кими кытта алтыспыттарын булан, мэдиссиинискэй кэтээн көрүүгэ ылаллар, лабораторнай чинчийии ыыталлар.
Дойдуга коронавирус туһунан чуолкай иһитиннэриилэри стопкоронавирус.рф саайтка киирэн көрүөххэ сөп.
Москваҕа ыалдьыбыт дьон үксэ Европа дойдуларыттан кэлбитэ билиннэ.
«Саха сирэ» хаһыат, edersaas.ru
Хаартыска — ТАСС.