Айсен Николаев коронавирус анаалыһа Новосибирскай лабораториятыгар бигэргэммитин туһунан эттэ
Бүгүн, кулун тутар 20 күнүгэр, Ил Дархан Айсен Николаев ЯТЭК хампаанньа генеральнай дириэктэрэ коронавируска туттарбыт анаалыһа Новосибирскай лабораториятыгар бигэргэммитин, чахчы ыалдьыбытын туһунан эттэ.
Өссө алта киһи Дьокуускай Роспотребнадзорун лабораториятыгар туттарбыт анаалыһа коронавирус баарын көрдөрбүт. Ону чуолкайдыырга анаалыстарын Новосибирскайга ыыппыттара түмүгэ кэлэр нэдиэлэҕэ биллиэхтээҕин туһунан Ил Дархан иһитиннэрдэ.
Билигин ол дьон кими кытта алтыспытын чуолкайдаан, балыыһаҕа туспа хоско угуохтара, ким ыалдьыбытын-суоҕун бэрэбиэркэлиэхтэрэ.
«Батсаапка ыалдьыбыт дьон улууска барбыттар, өрөспүүбүлүкэ тас өттүгэр көппүттэр диэн сымыйа сурах тарҕанна. Барыллаан коронавирустаабыт дьон бары манна балыыһаҕа бааллар.
РФ кылаабынай санитарнай бырааһын дьаһалынан, дойду кыраныыссатын тас өттүттэн кэлбит дьон булгуччу 14 күн дьиэлэриттэн тахсыбакка олоруохтаах. Ыарыйдахтарына бырааһы дьиэлэригэр ыҥыраллар.
Саха сиригэр аһынан-үөлүнэн хааччыллыы баар, икки ый тиийэр саппаастаахпыт. Мааска кэлэр нэдиэлэ бүтүөр диэри атыыга баар буоларын ситиһиэхпит«, —диэтэ Ил Дархан Айсен Николаев.
Маны таһынан, Ил Дархан ЯТЭК хампаанньа дезинфекциялыыр сириэстибэлэри, мэдиссиинискэй мааскалары атыылаһарга 50 мөлүйүөн солкуобайы биэрэрин туһунан эттэ.
Марианна Тыртыкова, «Саха сирэ», edersaas.ru