“Дьиэ кэргэнинэн коронавируһунан ыалдьыы элбэх”, — диэн иһитиннэрдэ өрөспүүбүлүкэтээҕи суһал ыстаап бэрэссэдээтэлэ Ольга Балабкина.
edersaas.ru
Бу ордук Дьокуускай куоракка сыһыаннаах. Биир дьиэ кэргэнтэн 4-түү, 6-лыы киһи: эбэлэр, эһэлэр, төрөппүттэр, оҕолор бука бары сыстыһан, билиҥҥи туругунан, инфекционнай балыыһаҕа сүүрбэччэ ыал киирэн, эмтэнэ сыталлар. Бу аймахтар буолан көрсүһүү, айылҕаҕа, даачаҕа тахсыы содула буолуон сөп.
— Сайын саҕаланан, оҕолор уһуйаан, оскуола көрүүтүттэн, хонтуруолуттан босхолоннулар. Үгэс курдук, каникул, уоппуска кэмигэр улуустарга айан, кэлии-барыы саҕаланыаҕа. Манна улуустарга баар чугас аймахтаргытын, эбэлэргитин-эһэлэргитин харыстааҥ диэн ыҥырабыт. Оҕолор биллибэккэ сылдьан, ыарыыны тарҕатааччы буолуохтарын сөп. Кыратык тумуулуох курдук буолбут киһи, дьиэттэн тахсыбакка, эмтэниэхтээх, көрдөрүнүөхтээх. Чугас дьоммун сыһыарыам диэн эппиэтинэс күүһүрүөхтээх, — диэн Ольга Балабкина бэлиэтээн эттэ.
Санатар буоллахха, ыам ыйын 27 күнүгэр 1529 ыалдьыбыт киһи баар, 587 киһи үтүөрдэ, 7 киһи тыына быһынна. Суукка иһигэр 84 киһи ыарыйда, 32 киһи балыыһаттан таҕыста.
Ангелина Васильева, “Саха сирэ” хаһыат, edersaas.ru
Хаартыска: mkchita.ru