Айсен Николаев судаарыстыбаннай былаас ситэриилээх уорганнарын 2019 сыллааҕы отчуота онлайн көрүҥүнэн ыытылынна. Кини Ил Түмэн дьокутааттарыгар ыраахтан олорон үлэлииллэригэр махтанна. “Төһө да коронавирус инфекцията тарҕанар куттала баарын иһин, олох биир сиргэ турбат, үлэ тохтообот, суһал быһаарыыны эрэйэр түгэннэр элбэхтэр”, — диэн кини эттэ.
Билиҥҥи кэмҥэ бырабыыталыстыба үлэтэ, бастатан туран, инфекция тарҕамматын, дьон доруобуйатын, олоҕун харыстааһын туһугар ананар, онтон экэниэмикэ уонна социальнай өттүнэн туруктаах буолууну ситиһэргэ туһаайыллар.
Ылыллыбыт миэрэлэр, доруобуйа харыстабылын систиэмэтин күүһүрдүү түмүгэр, коронавирус балысханнык тарҕанарын уҕарытан тураллар.
— Кылгас кэм иһигэр инфекционнай стационардар 3 таһымнаах систиэмэлэрин түргэнник тэрийдибит. 2 ый иһигэр коронавирустаах ыарыһахтарга 435 куойкаттан 1500 куойкаҕа диэри элбэттибит. Стационардар эминэн-томунан, харыстанар малларынан, реанимациялыыр тэриллэринэн хааччыллыбыттара, — диэн кини эттэ.
Аан бастаан күҥҥэ 200 тест оҥоһуллар буоллаҕына, билигин 4000 анаалыс оҥоһуллар. 11 лаборатория тигинэччи үлэлиир. 100 тыһыынча киһиэхэ 330 тест оҥоһуллар, бу Арассыыйаҕа үчүгэй көрдөрүү. Айсен Сергеевич этэринэн, анаалыс элбэхтик оҥоһуллар буоллаҕына, ыарыы эрдэ булуллар, онон киһи баалаппакка, эрдэ эмтэнэн, чэпчэкитик аһардар. Бу дьон доруобуйатыгар улахан суолталаах.
Билиҥҥи туругунан, коронавируһу утары охсуһууга, медиктэргэ төлөбүрдэри киллэрэн туран, федеральнай бүддьүөттэн уонна өрөспүүбүлүкэ резервнэй пуондатыттан 1,7 миллиард солкуобай ороскуоттанна.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.