Саха АССР үтүөлээх учуутала, РСФСР уонна ССРС үтүөлээх тренерэ Дмитрий Петрович Коркин үөрэппит уолаттарын ситиһиилэрэ 1965 сылтан саҕаламмыта.
Бастакынан тустуу сайдарыгар сөптөөх суолу булуутугар Слава Карпов уонна Алексей Ермолаев ситиһиилэрэ тирэх буолбуттара. Слава 1964 сыллаахха сойууска тустан 5-6-с миэстэ буолбута. Манна кини ыстарааптыыр очукуота туолан, кыайбыт уолаттарын кэннилэригэр хаалбыт. Бу – ол саҕанааҕы быраабыла ирдэбилэ этэ. Онон Слава миэстэлэспэтэҕэ. Манна Слава албаһы оҥорон кыайыыны аҕалар очукуолара ситэтэ суох. Албас бүтэһик түһүмэҕин олус чуолкайдык оҥоруохха сөбү эрэйэр. Албаһы толору, тиһэҕэр тиийэ оҥоруу утаралаһааччыгын икки саннын хаптаҕайдарыгар хам баттааһын – булгуччулаах түгэн. Маннык албаһы бүтэһик хамсаныытыгар тиийэ оҥоруу элбэх хатылааһынтан тахсар. Утрылаһааччыгын араас албаһынан тиэрэ түһэрэҕин уонна хам баттыыгын, санныларын сыһыараҕын. Бу күрэхтэһии кэнниттэн Слава Карповка тус бэйэтигэр сорудахтар бэриллэннэр, олор толору туоланнар түмүк баар буолбута.
1968 сыллаахха Киевскэ Илларион Федосеев, Сеня Морфунов оҕолорго сойууска бастыыллар. Ригаҕа ыччаттарга 52 киилэҕэ Роман Дмитриев бастыыр, убайа Гаврил үһүс миэстэ буолар. Оттон Болгария Хасково куоратыгар ыччат IX – с аан дойдутааҕы фестивалыгар Петя Платонов уонна Коля Захаров иккис миэстэни ылаллар. Бу Дмитрий Петрович эрчийбит уолаттара омук сиригэр аан бастакы холонуулара этэ.
Сыры-сыллата тренербит үөрэнээччилэрин ситиһиитэ элбээтэр-элбээн испитэ. Бу курдук аан дойду таһымнаах ситиһиилэр уонна сойуус түһүлгэлэригэр күргүөмүнэн туйгун көрдөрүүлэр Дмитрий Петрович 12 сыл иһигэр ситиһиллибиттэрэ уонна көрдөрүү өссө үрдүөн, тупсуон сөбүн көрдөрбүттэрэ. Манна холобурунан Роман Дмитриев Москваҕа ССРС үтүөлээх тренерэ С.А. Преображенскайга дьарыктана барыыта буолбута. Бу сыл кини аан дойду таһымыгар туста тахсан, Дмитрий Петрович үлэтэ-хамнаһа, былаана сөпкө торумнанан иһэрин туоһулаабыта.
Онтон 1970, 1971, 1972, 1973 сылларга саха тустууктара Канадаҕа, Тбилисигэ, Мюнхеннааҕы Олимпиадаҕа тиийэ аатыраллар. 1976 с. Одессаҕа буолбут ССРС чемпионатыгар Роман Дмитриев, Александр Иванов, Павел Пинигин чөмпүйүөннүүллэр. Онон Сэбиэскэй сойуус урдук модун дойду сүүмэрдэммит олимпийскай хамаандатыгар киирэн, Монреальга тустан, Романнаах Александр үрүҥ көмүс призердар, Павел Олимпиада чөмпүйүөнэ буолаллар.
Саха диэн омук бу орто дойдуга олорорбут туһунан өйдөбүлү, тустуубут аан дойду чыпчаалын таһымыгар тахсыыгар Дмитрий Петрович улахан өҥөлөөх. Кини тус үлэтигэр ураты бэриниилээх буолан, аналлаах физкультурнай үөрэҕэ да суох буоллар, сахалыы толкуйунан тобулан, эт мэйиитинэн мэлийэн, саҥаны бэйэтэ анааран толкуйдаан оҥорбут билиитин-көрүүтүн олоххо ситиһиилээхтик киллэрбит уһулуччулаах учуутал, үтүөлээх тренер этэ.
Дмитрий Петрович тустууга сыһыаннаах олох-дьаһах араас хайысхаларын — спортивнай медицинаны, анатомияны, биохимияны, психологияны, киһи физиологиятын; ньиэрбэ систиэмэтигэр физическэй ноҕурууска дьайыытын, биомеханиканы барытын эндэппэккэ билэрэ. Үрдүк иҥэмтэлээх астар, тус гигиена туһаларын кэпсиирэ, эрчийэр уолаттарыгар тустуу туһунан киинэлэри, уруһуйдары көрдөрөрө. Маны таһынан, бэйэтэ айан күүһү хачайдыыр тэриллэри оҥорон эрчийэрэ, ССРС сүүмэрдэммит хамаандатын иннинэ күннээҕи дьарыктар ахсааннарын эппитэ. Учууталбыт бачча киэҥ араҥа аттарыллан, үөрэтиллэн, чочуллан, үөрэнээччилэригэр маннык үрдүк ситиһиилэри түстээбитэ саарбаҕа суох. Үйэҕэ биирдэ кэлэн барар сүдү дьоммутуттан биирдэстэринэн Дмитрий Петровиһы ааттыыбын.
Үөрэнээччитэ Сэмэн ОКОЙУОМАП.