Бэс ыйын 25 күнүттэн Төрүт Сокуоҥҥа уларыйыылары киллэрэргэ куоластааһын саҕаланна. Куоластааһын сэттэ күн устата буолуоҕа. Тоҕо диэтэр, бу миэрэ элбэх киһи мустубатыгар, ыарыыга сыстыбатыгар туһуланар.
Бастакы күн куорат 804 №-дээх быыбардыыр учаастагар сарсыардаттан биирдиилээн дьон кэлэн, куоластаан саҕалаатылар.
Иван Петров, Ньурба олохтооҕо:
— Төрүт Сокуон ылыллыбыта ырааттаҕа. Ол саҕана атын кэм, атын хамсааһыннар этилэр. Билиҥҥи кэмҥэ барыта сайда турар, олохпут тутулун хамсатар Конституциябыт эмиэ тэҥҥэ сайдыахтаах. Онон саҥа хамсааһыннартан, уларыйыылартан туора турбакка, өйүөхтээхпит дии саныыбын.
Харыстанар ньымалара барыта баар, тэрээһин өттүгэр миэхэ ыйытыы суох. Кыраадыспын кээмэйдээтилэр, илиибэр антисептик ыстардылар, бэрчээкки биэрдилэр. Биллэн турар, сыстыһар куттал хаһан баҕарар баар, ол эрээри, мин санаабар, туох баар миэрэни тутуһан, хайаан да куоластыы кэлэн, гражданскай иэскин төлүөхтээххин. Мин Дьокуускайга кэлэн баран, хайаан да куоластыахтаахпын диэн, быыбардыыр учаастакка кэлэн, суруйтарбытым.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.