Саха дьонугар-сэргэтигэр биллэр-көстөр шоумен, «Ыллыыр мыраан» оҕолору ырыаҕа, сыанаҕа сатаан саҥарарга-иҥэрэргэ, үөрэтэр лааҕырдаах Клим Федоров, аны, үҥкүү ансаамбылларыгар инстаграмынан күрэс тэрийдэ.
Коронавируһунан харантыын биллэриллибит кэмигэр, тоҕо маннык куонкуруһу тэрийбитин кини маннык быһаарда:
—Үлэлээбит сылларым усталарыгар тыа сирин кулууптарыгар сырыттым ини, сылдьыбатым ини. Барахсаттар үлэ бөҕөнү үлэлииллэр, ансаамбыл арааһын тэрийэллэр. Онно анаан таҥас-сап бөҕө атыылаһаллар, тиктэрэллэр. Оттон ансаамбылы тэрийии биир күннээх үлэ буолбатах. Манна барытыгар толкуй, дьону кытары сатаан кэпсэтии, өйдөтүү, бэйэҕэ тардыы үлэтэ өр кэмҥэ тиһиктээхтик салҕаныан наада эбээт. Аны бу ансаамбыл дьонун бэлэмнээһин, үөрэтии, о.д.а. сыра элбэх буоллаҕа.
Дьэ, маннык түбүгүрэн, тэринэн баран, үксүлэрэ бөһүөлэктэригэр кэнсиэрдииллэр. Ырааттаҕына улуустарын киинигэр, ыаллыы бөһүөлэктэригэр биирдэ эмэ бараллар. Оттон өрөспүүбүлүкэтээҕи тэрээһиҥҥэ сылга биирдэ, баҕар, хас да сылга биирдэ кыттыахтара. Онно да кинилэр хайдах ыллыылларын, үҥкүүлүүллэрин аҕыйах киһи, ону да үксүн дойдулаахтара эрэ көрөн-истэн хаалаллар.
Мин кинилэр үлэлэрин көрдөрөр, киэҥ эйгэҕэ билиһиннэрэр сыаллаах-соруктаах уонна дьаҥ кэллэ, куттал буолла диэн санааҕа баттатан, харантыыҥҥа дьиэҕэ бүгэн таах олорумуоҕуҥ диэн, маннык күөн күрэһи тэрийдим.
Тыа сирин ансаамбылара, үҥкүүһүттэр кытталлар. Бастыҥ үҥкүүлэрин устан ыыталлар. Ансаамбыл аата-суола, ханнык улуустан кыттара, нэһилиэгэ, үҥкүүтүн аата барыта ыйыллар.
Оттон ансаамбл үҥкүүтүн көрүөн уонна куоластыан баҕалаахтар, Kiliimfedorov@kiliim киирэн суруталлар уонна сөбүлээбит ансаамбылларыгар куоластыыллар. Ол аата, манна ансаамбыл үлэтэ көстөр, сыаналанар. Бу бастатан туран, дьону-сэргэни түмэр, сомоҕолуур, доҕордоһуннарар, санаа атастаһар, сэһэргэһэр кыаҕы биэрэр. Онон, харантыыҥҥа олорор кэмҥэ анаан сэргэхситэр куонкуруска киирэн куоластааҥ, — диэн кэпсээтэ.
Маннык күөн күрэһи ырыаһыттарга, ырыа ансаамбылларыгар, уран тарбахтаах иистэнньэҥнэргэ, мас, тимир уустарыгар, визажистарга, уо.д.а. ыытарга үлэ ыытылла турарын эттэ.