Коронавируһу бохсууга суһал штаб салайааччытын солбуйааччы Ольга Балабкина уочараттаах брифини ыытта.
Кини өрөспүүбүлүкэҕэ кутталлаах дьаҥ туруоҕуттан 4178 киһи ыалдьыбытын бэлиэтээтэ. Ааспыт сууккаҕа 50 киһи бу дьаҥҥа хаптарбыта биллибит. Биллэн турар, Дьокуускайга ыалдьыбыт киһи ахсаана арыый аҕыйаабыт. Ол эрээри, Мииринэйгэ – 4, Ленскэйгэ – 2, Нерюнгрига – 6, Тааттаҕа – 1 киһи ыалдьыбыта бэлиэтэнэр. Ольга Балабкина Ленскэйгэ уонна Нерюнгрига болҕомто ууруллуохтаах диэтэ.
— Мин бүгүн үгүстүк көрсүллэр үс боппуруоска тохтуохпун баҕарабын. Ол иһитиннэриилэри этэргэ, сыыппараҕа сыһыаннаах. Сыыппара чуолкай буоларын туһугар күн аайы иһитиннэрэбит. Ил Дархан, мин уонна Роспотребнадзор салайааччыта Маргарита Игнатьева. Оройуоннар суһал ыстааптарын иһитиннэриилэрэ сороҕор чуолкайа суох буолар. Тоҕо диэтэххэ, ыарыһахтар анаалыстара оройуоҥҥа оҥоһуллар, ону сороҕор Роспотребнадзор бигэргэппэт. Ити түмүгэр араастаһыы тахсыан сөп. Өссө биир балаһыанньа — федеральнай ханааллары кытта сыыппара араастаһыыта. Манна араастаһыы, иһитиннэриини биэрэр бириэмэлэрин кытта сибээстээх, — диэтэ Ольга Валерьевна.
Кини салгыы ыалдьыбыт дьон эмтэниилэрин тиһигин аҕынна. Инфекционнай ыарыыны бохсуу Саха Өрөспүүбүлүкэтин сиригэр-уотугар хас да кэрдииһинэн ыытыллар. Быһата, ыалдьыбыт киһи ыарыытын туругуттан тутулуктаах. Уонна үс сүһүөҕүнэн ыытыллар. Ол курдук, сорохтор, ама туруктаахтар дьиэҕэ эмтэнэллэр. Дьиэлэригэр эмтэнэр кыахтара суох буоллаҕына, балыыһаҕа эмтииллэр. Орто туруктаах дьон стационарга эмтэнэр буоллахтарына, ыарахан ыарыһахтары өрөспүүбүлүкэтээҕи инфекционнай балыыһаҕа эмтииллэр. Уонна киин килииникэлэри кытта сибээстэһэн эмтииллэр.
Үгүстүк ыйытыылар киирэллэр эбит. Холобур, ыарыһах “Суһал көмөҕө” эрийэн температуралаахпын диир. Оттон киниттэн анаалыс ылбаттар эбит. Эбэтэр “Суһал көмө” эмчитэ эйигин балыыһаҕа угарга миэстэ суох диир уо.д.а. Итинник түгэннэргэ, үс күҥҥэ биирдэ бары төлөпүөнүнэн киирбит этиилэри кэтээн көрүөхтэрэ, үөрэтиэхтэрэ. Ол аата, ыарыһах болҕомтото суох хаалбат эбит диэн түмүккэ кэлиэххэ сөп.
Женни Стрюкова
Хаартыска: архыып