Киин куорат олоҕу-дьаһаҕы хааччыйар тэрилтэлэрэ өрөбүлэ суох үлэлииллэр
Киин куорат олоҕу-дьаһаҕы хааччыйар тэрилтэлэрэ өрөбүлү аахсыбакка үлэлииллэр.
edersaas.ru
«Якутдорстрой» АУо кылаабынай инженерэ Александр Оданец этэринэн, сааскы халааны көрсөр дьаһаллар саҕаламмыттар. Куорат уулуссаларын хаарын ыраастаан таһар үлэ кыраапык быһыытынан барар, билиҥҥи туругунан 475 108 куб хаар таһыллыбыт.
– Муус устар 15 күнүгэр диэри кыһыҥҥы үлэни түмүктээн, уулуссалары муус тобоҕуттан, чалбахтан ыраастыахпыт. Билигин икки симиэнэнэн аҕыстыы чаас үлэлии сылдьабыт. Бастакы симиэнэ сарсыарда 8-тан киэһэ 5 чааска диэри үлэлиир, түүҥҥү симиэнэ киэһэ аҕыстан тахсар. Суол оробуочайдара, мэхэньисээтэрдэр, суоппардар, силиэсэрдэр маасканан толору хааччылыннылар, сааһырбыт оробуочайдар (уон киһи) дьиэлэригэр олороллор, – диир Александр Оданец.
«Жилкомсервис» МУТ өрөбүлгэ күнүскү симиэнэҕэ 18, түүҥҥү симиэнэҕэ 12 массыынаны таһаарар буолан, кытаанах хомунаалынай тобоҕу хомуйуу тиһигэ тохтообот. Бэйдиэ сылдьар ыттары ЕДДС-ка киирэр сайаапканан анал биригээдэ тутар.
– Хааччыллыыта суох уопсай дьиэлэр бөхтөрүттэн эрэгийиэннээҕи оператор аккаастанан, куорат тэрилтэтэ дьаһайар. Түөрт массыыналаах, аҕыс самосваллаах. Куорат олохтоохторо тупсаҕай уонна куттала суох усулуобуйаҕа олороллорун туһугар сөптөөх үлэ тэриллэр, – диир «Жилкомсервис» МУТ салайааччыта Валерия Билоус. Бу туһунан киин куорат пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru