Куорат дьаһалтатыгар «Чэлгийэр Дьокуускай» хайысха оробуочай бөлөҕүн мунньаҕар көҕөрдүү уонна ырааһырдыы үлэтин былаана бигэргэннэ.
— Быйыл бэһис сылын ыытыллар «Чэлгийэр Дьокуускай» хайысханан «Тупсарыы» салаата эмиэ үлэлиэ. Эрдэттэн былааннаммыт дьаһаллары сэргэ Үтүө дьулуур уонна новаторство сылларынан саҥа идиэйэлэр, этиилэр олоххо киллэриэхтэрэ, —— диир хайысха кураатара, куорат баһылыгын сүбэһитэ Наталья Демина.
Онон, куорат киинигэр эрэ буолбакка, кытыы кыбаарталларга көҕөрдүү уонна ырааһырыы үлэлэрэ күүскэ тэриллиэҕэ. Мантан саас үгэскэ кубулуйбут «Вызов-кузов!» экологическай аахсыйанан куорат иһигэр тарҕанан сытар сүүс куусап хомуллан, сыбаалкаҕа таһаарыллыаҕа. Онуоха быраҕыллыбыт тиэхиньикэлэр хаһаайыттара ыстараапка тардыллыахтара. Куорат административнай хамыыһыйатын салайааччы Николай Габайдуллин этэринэн, икки сыл тухары биэс эрэ киһи хаарбах тиэхиньикэтин бөххө бэйэтэ илдьибит, оттон бу кэм устата волонтердар 500 куусабы хомуйбуттар. Сир хараардаҕына, өрүс уонна ханааллар кытылларын ыраастааһыҥҥа «Ыраас кытыл» аахсыйа саҕаланыа. Москватааҕы «Стрелка» конструкторскай бюро Сайсары күөлүттэн Каландарашвили уулуссатыгар диэри ханаалы ыраастааһыҥҥа оҥорбут бырайыага быйыл олоххо киллэриллиэ. Гагаринскай уокурук салайааччыта Руслан Платонов көҕүлээһинэн быйыл саҥа тэриллэр «Дьиэ кэргэн маһа» аахсыйанан куорат дьоно дьиэ кэргэнинэн мас олордуохтара. Маны таһынан кадушкаларга мас олоруллара былааннанар, билигин ол кадушкалары хайдах быһыылаахтык оҥорор туһунан дьүүллэһиллэр. Архитектура уонна куораты тутуу бэлиитикэтин управлениета экологическай былаһааккалар миэстэлэрин быһаара сылдьар. Оробуочай хамыыһыйа чилиэннэрин этиитинэн, экологическай былаһаакка элбэх дьиэлээх олбуордпрга уонна уопсастыбаннай миэстэлэргэ дьоҕус ойуур курдук оҥоһуллуохтаах. Кулун тутар 31 күнүгэр диэри ландшафтнай архитектура бары ирдэбилинэн олордуллубут “сибэкки көбүөрүн” оҥорор аҕыс сир быһаарыллыаҕа.
Раиса Сибирякова, “Саха сирэ” хаһыат, edersaas.ru.