Сир аһын астааччылар, айылҕаҕа сынньаналларын сөбүлүүр дьон билиитигэр РФ Ыксаллаах быһыыга-майгыга министиэристибэтин Саха сиринээҕи управлениета сүбэ биэрэр. Өскөтүн мунан хааллахха, тугу гыныллыахтааҕын туһунан.
Бастатан туран, паникалаамаҥ. Уоскуйан, өйү-төйү булунан, сааһыланан баран, барыахтаах сиргин хат торумнуу сатаа. Өскөтүн барар хайысхаҕын кыайан быһаарбатаххына, үрэҕи, күөлү була сатаа уонна олорунан салайын. Онтон туох эмит ыллыкка дуу, суолга дуу биитэр уот ситимигэр тахсан кэллэххинэ, олортон тэйбэккэ, ону тутус.
Быһалыы бара сатаама. Өскөтүн биир сиргэ хат-хат эргийэн кэлэ турар буоллаххына, долгуйума – ити “уҥа атах дьайыыта” дэнэр, киһи биир хардыыта иккиһиттэн кылгас буолар. Төһө да көнөтүк бара сатаабытыҥ иһин, син биир туора диэки халыйа туруоҥ. Хайалаах сиргэ ол эргиир кылгас, оттон көнө сыһыыга уһун соҕус буолуоҕа. Ол иһин, биир эргиир кэнниттэн тохтоон, кутаа уот оттон, көмө кэтэһэн олорбутуҥ ордук.
Ол-бу тыаһы-ууһу истэ-чуҥнуу сырыт. Киэһэ хойут, туман түспүтүн кэнниттэн, тула өссө чуолкайдык иһиллэр буолар.
Өскөтүн хаһыа да буолан муммут буоллаххытына, уочаратынан утуйаргыт ордук. Биир киһи дьуһуурустубаҕа олороро сөп. Хонорго эрдэттэн, халлаан сырдык эрдэҕинэ, бэлэмнэнэр наада: кураанах сири булан, уот оттор мас бэлэмнэнэн. Уот оттор кыаххыт суох буоллаҕына, көҕүс көҕүскэ сыстыһан олордоххо, кэм сылаас буолар, улаханнык тоҥмоккун.
Ойуурга барыах иннинэ, чугас, билэр дьоҥҥор хаһан, хайа диэки бараргын кэпсиир, сэрэтэр ордук. Сырдык, харахха ыраахтан быраҕыллар өҥнөөх таҥаһы таҥын уонна соннук иһиттэ ыл. Күөх тыа ортотугар чуо көстөр курдук.
Тыаҕа барарга, иһэр уу, испиискэ, туус, быһах уонна чаһы ылыахха наада. Бу хайаан да туһалыыр маллар.
Оттон өскөтүн испиискэҥ да, чаһыҥ да, куомпаһыҥ да суох буоллаҕына биитэр хайа дики бараргын отой билбэт буоллаххына, сыраҕын-сылбаҕын бараабакка, күүскүн эспэккэ, биир сиргэ олороруҥ ордук – оннук түргэнник булуохтара.
Вера МАКАРОВА