Хаҥалас улууһун Үөһээ Бэстээх бөһүөлэгэр баар 3 №-дээх уопсай эрэсиимнээх холуонньаҕа буруйдарын боруостааччылар усулуобуйаларын көрө-билсэ, СӨ Киһи быраабыгар боломуочунайа Сардаана Гурьева киирэ сырытта.
Бу туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.
Омбудсмены холуонньаҕа РФ Накаастабылы толорор федеральнай сулууспатын Саха сиринээҕи управлениетын начальнига Владислав Дзюба, начальник киһи быраабыгар көмөлөһөөччүтэ Анастасия Потапова уонна бу холуонньа салалтата арыаллаатылар.
Киһи быраабыгар боломуочунай холуонньа сүрүн эбийиэктэригэр — дьуһуурунай чааска, медико-санитарнай чааска, хаайыылаахтар олорор этэрээттэригэр (уопсай дьиэлэргэ), тэлэбиисэр көрөр хосторугар уонна таҥара дьиэтигэр сырытта.
Боломуочунай ураты болҕомтотун буруйдарын боруостааччылар доруобуйаларын туругун бэрэбиэркэлээһин боппуруостарыгар уурда: стоматология уонна флюорография хосторун көрдө.
Маны таһынан, соторутааҕыта Ленскэй куоракка сабыллыбыт ураты эрэсиимнээх холуонньаттан аҕалыллыбыт хаайыылаахтар олорор усулуобуйаларын билистэ, кинилэри кытта кэпсэттэ.
Салгыы Сардана Гурьева хаайыылаахтары кытта биирдиилээн көрүстэ, онно биир да үҥсүү киирбэтэ.
Оробуочай сырыыны түмүктүүр мунньахха накаастабылы толорор уорганнар уонна Киһи быраабыгар боломуочунай салгыы бииргэ үлэлэһэр былааннарын ырытыстылар.
Санатар буоллахха, Сардаана Гурьева СӨ Киһи быраабыгар боломуочунайынан 2017 сыл күһүнүгэр ананан баран, сэтинньи ыйга аан бастакытын Дьокуускай куорат 1 №-дээх кытаанах эрэсиимнээх холуонньа үлэтин билсэ-көрө киирэ сылдьыбыта.
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.