Бу күннэргэ Анаабырга сүппүт дьон туһунан социальнай ситимнэргэ санаа атастаһыыта, ырытыы бөҕө буола турар.
edersaas.ru
Холобура, бу сурукка араас кэпсэтии бара турар (суругу көннөрбөккө, батсаапка хайдах суруллубутунан холобурдуубун):
«Анаабырга суппут Кэрэчээнэ маамата Евдокия уонна Кэскилээнэ дьонннорун кордуу Саскылаахха котоллоругэр харчылара суох олороохтууллар. 8 (984) 112-97-79 Кэскилээнэ Номера бу привязанный мобильный банк. Ким утуо санаалаах дьон баьаалыста комолоьун. Ким тоьо кыалларынан«.
Биллэн турар, үгүс дьон маннык сурукка үтүөнэн хардараллара чахчы. Ол эрээри, бүгүн биир батсаап-бөлөххө маннык ис хоһоонноох сурук кэллэ (эмиэ хайдах суруллубутунан холобурдуубун):
«Бу маннык суруктарга ыытымаҥ диэтилэр, бэйэлэрин номердара буотах, кинилэр көрдөспүт буотахтар уонна көрдүү кинилэр хайдах барыахтарай, саастаах чүөчэ уонна кыыс, атын хамаанда эр дьоннор барбыттара көрдүү».
Онуоха хоруйдар: «Аата сурун. Ол иьин хайдах эрэ ээ»; «Дьон кыһалҕатын туһаныы-ыар аньыы...».
Мин бастаан утаа ити ыыппыт төлөпүөннэригэр эмиэ эрийэн көрдүм. «Занятайы» биэрэ турар. Хаста да эрийдим.
«Кырдьык да, атын киһи төлөпүөнэ быһыылаах» — диэн санаа үөскээн ылла. Ол кэннэ Кэскилээнэ төлөпүөнүн ыыппыттарын «сохраняйдаан» баран, эрийбиппэр, кыыс ылла.
— Наһаа элбэх киһи эрийэр. Атын төлөпүөн буолбатах, миэнэ. Ити убайым батсаапка суруйбута тарҕаммыт этэ. Бүгүн ийэбинээн Сааскылаахха көтөөрү олоробут да, «задержканы» биллэрдилэр. Пуорка баарбыт, көтөрбүтүн кэтэһэбит.
Бэҕэһээ Ил Дархан Айсен Николаев миэхэ эрийбитигэр соһуйбутум аҕай. Кини бөртөлүөт көрдүү барарын, көрдөөһүн хайдах барыаҕын быһаарбыта, уоскуппута. Сааскылаахтан Үрүҥ Хайаҕа диэри кыһын массыынанан 3-4 чаас айанныыбыт. Бураанынан быһалыы эмиэ сылдьааччылар. Кэрэчээнэлиин Дьокуускайдааҕы речной училищеҕа 4-с кууруска үөрэнэбит.
Быйыл бүтэриэхтээхпит. Каникул кэмэ буолан, Кэрэчээнэ дойдутугар сынньана барбыта. Бурааны аҕам табаарыһын кытта атастаһа-атастаһа ыытан испиттэр… — диэн кэпсээтэ Кэскилээнэ Туприна.
Дьэ, онон батсаап сонуннарыгар итэҕэйбэккэ, сүрүн эппиэттээх иһитиннэрэр-биллэрэр ситимнэргэ — хаһыакка, интернет-таһаарыыга, араадьыйаҕа уонна телевидениеҕэ тахсар сонуннары истиҥ диэн сүбэлиибит. Батсаапка араас буолар-буолбат иһитиннэриилэри тарҕатан, көрдүү сылдьар дьону буккуйуохха сөбүн эмиэ толкуйдуур наада.
Елена ПОТОЦКАЯ, «Cаха сирэ» хаһыат, edersaas.ru
Хаартыска — интернеттэн.