Дьокуускайга баар Атласовтар этно-уһаайбаларын кэлэктиибэ сылтан-сыл саҥаны оҥорон ыалдьыттарын үөрдэр үгэстээх. Быйыл манна бүрүөһүннээх, сылаас спортивнай оонньуулардаах комплексы арыйдылар.
Эргиччи күлүмүрдэс уотунан угуйар бырааһынньыктааҕы былаһааккаҕа муус остуоллаах бильярд, остуол хоккейдара бааллар. Маны таһынан, “Кыыс Анды” кёрлинг, “Боотур” боулинг арыйбыттара дьон болҕомтотун тарта. Бэлиэтээн эттэххэ, оонньуулар тэриллэрин барытын дулҕаттан оҥорбуттара кэрэхсэбиллээх.
Саҥа сахалыы оонньуулар быраабылаларын билиһиннэрэбит.
«Кыыс Анды» кёрлинг быраабылата:
- Иккилии, түөртүү киһилээх икки хамаанда тэриллэр. Хайа хамаанда оонньууну саҕалыыра бастакы андыны эргитэн, тумса кимнээххэ туһаайыллыбытынан быһаарыллар.
- Хамаандалар икки төгүл төхтүрүйэн икки андыны түгэх эргимтэҕэ тиийиэр диэри анньаллар.
- Оонньуу барыта алта түһүмэхтээх.
- Түгэх эргимтэ киинигэр киирбит андылаах хамаанда кыайыылаах тахсар. Хамаандалар хайаларын андыта кииҥҥэ киирбэтэх, ол гынан баран чугаһаппыттар сүүйүүлээх буолаллар.
- Түмүгү алта түһүмэҕинэн таһаараллар.
- Бүтэһик анньыы быһаарыылаах буолуон сөбүн умнумаҥ.
«Боотур» боулинг икки дорожкалаах, манна хамаанда аайы түөртүү дулҕаттан оҥоһуллубут таастар бааллар. Түөртэ анньан түгэххэ турар биэс кеглилэри сулларбыт хамаанда кыайыыны сурунар.
Улахан остуоллаах хоккей
Иккилии буолан түөрт киһи утарыта оонньуур. Элбэх шайбаны лузаҕа киллэрбит хамаанда кыайар.
Кыра остуоллаах хоккей
Хас биирдии остуол үстүү лузалаах. Икки киһи утарыта туран киирсэр. Ким элбэх шайбаны лузаҕа киллэрбит кыайыылаах буолар.
Этно-уһаайбаҕа баар биллиилээх скульптор, норуот маастара Федор Марков муус оҥоһуктардаах булууһун, дулҕаттан, талахтан, хомустан, кумахтан, туойтан дьэрэкээн оҥоһуктары, «Уйгу» диэн туой сэргэни сэргии көрүөххүтүн, хаартыскаҕа түһэн үйэтитиэххитин, маны таһынан, минньигэс астаах кафеҕа сынньаныаххытын сөп.
Сахабыт сирин тоһуттар тымныылаах кыһынын ортото ичигэс былаһаакка иһигэр сахалыы интэриэһинэй оонньууларынан куоталаһар, бириэмэбитин умнуллубаттык атаарар кыахтаммыппыт үөрдэр! Эһигини Бүлүүлүүр суол 6 км турар 6 №-дээх дьиэҕэ күн аайы сарсыарда 10 чаастан киэһэ 22 чааска диэри күүтэллэр. Б.т.: 720-709, 89841024447
Инстаграм-аккауннар:
@etno_usadba
@texasbbq_usadba
@restaurant_atlasovykh
Биһиги корр.