Уотунан оонньуур ойохтор бааллар эбит. Киһи да бэркиһиир! Эчи, «хорсуннара» да бэрт!
Ленскэй оройуонугар биир дьахтарга РФ Холуобунай кодексатын 306-с ыст. 1 чааһынан, ол эбэтэр, буруй оҥоһуллубутун туһунан көстөн турар сымыйа тыллабыры оҥорууга, суут бириигэбэрэ тахсыбыт.
Суут быһаарбытынан, бу дьыл балаҕан ыйын саҥатыгар дьахтар итирэн баран, «гражданскай» эринээн кыыһырсыбыттар. Ол абарбыт уоҕар, дьахтар полицияҕа сайабылыанньа суруйбут — эрим быһаҕынан тирээн туран өлөрөрүнэн суоһурҕанна диэн.
Ирдэбил быһыытынан, киирбит сайабылыанньа буруйу оҥоруу туһунан иһитиннэриилэр кинигэлэригэр учуоттанар-бэлиэтэнэр. Сайабылыанньа суруйарыгар бу дьахтары эмиэ сэрэппиттэр — сымыйа тыллабыр иһин холуобунай эппиэтинэс көрүллэр диэн. Онуоха суолта биэрбэтэх.
Онтон сайабылыанньаҕа ыйыллыбыт чахчыны бэрэбиэркэлээһин ити тыллабыр сымыйатын, оруна суоҕун быһаарбыт.
Инньэ гынан, эрин иэстэһээри, кэһэтэн биэрээри, полицияҕа тыллаабыта дьахтарга бэйэтигэр тиэрэнэн эргиллибит.
Суут сымнатар өрүттэри уонна эрин санаатын учуоттаан, буруйдаах дьахтары 10 тыһ. солк. сууммалаах ыстараап төлүүргэ уурбут.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.