“Павловскайдааҕы үүт собуота” кэпэрэтиип биэс нэһилиэк хаһаайыстыбатын үүтүн тутан, сылы эргиччи астыыр.
– Ыстаатынан барыта уон тохсуобут, – диир кэпэрэтиип салайааччыта Елена Оконешникова. – Бэрэссэдээтэл — мин, кылаабынай буҕаалтыр, лабараан, түөрт оробуочай, түөрт нэһилиэгинэн үүтү тутааччылар, суоппар, харабыл газооператордар, силиэсэр электрик буолан үлэлиибит. Улахан кыамталаах лииньийэлэргэ аҕыйах үүтү астыыр барыһа суох буолан, билигин үүтү күн өрүү-өрүү тутабыт. Үс туонна курдук буолар. Сайыҥҥы үүтүгэннээх кэмҥэ сэттэ-аҕыс туоннаҕа тиийэ тутарбыт. Үүтү Нөөрүктээйи, Хаптаҕай, Ороссолуода уонна Дьаҥхаады нэһилиэктэрэ туттараллар, II Тыыллымаҕа арыы сыаҕа үлэлиир. Төһө кыалларынан, цельномолочнай бородууксуйаны оҥорорго үлэлэһэбит, ол гынан баран, арыы син биир тахсар, үүтү туттарааччылар бэйэлэрэ да арыынан ыларга интэриэстээхтэр.
Собуокка технолог Анастасия Герасимова, буҕаалтыр Февронья Оконешникова, лабараан Сардаана Стручкова, оробуочайдар Матрена Оконешникова, Евдокия Чаисова, Вероника Дмитриева, Анна Туприна үлэлииллэр. Федор Оконешников массыынанан үүт таһар. Өссө биир үүт таһар уонна рефрижератордаах массыыналардаахтар, бары 3,5 туонналаах көлөлөр.
Собуот үүтү сылы эргиччи туран, суорат арааһын, чөчөгөйү, сүөгэйи астаан, кыраапыгынан биир күн Майаҕа уонна Аллараа Бэстээххэ, биир күн Дьокуускайга маҕаһыыннарга тиэрдэр. Аллараа Бэстээххэ хаһыс да сылын кыра атыы пуунун үлэлэтэр. Саамай элбэх үүтү Хаптаҕай олохтоохторо уонна Павловскайга Михаил Егоров аатынан хаһаайыстыба туттараллар.
“Павловскайдааҕы үүт собуота” кэпэрэтиип быйыл “Майатааҕы үүт кэмбинээтэ” кэпэрэтиипкэ 2,5 мөл. солк. үбү бородууксуйатын атыытыттан төлөһүөхтээх. Дуогабардарын болдьоҕо ахсынньыга бүтэр. Биллэн турар, дуогабардара уһатылларыгар баҕалаахтар. Дуогабар сыаната үрдэтиллэн иһэрэ Елена Львовнаны, кистээбэккэ эттэххэ, мунчаарар:
— Үрдүүрэ биһиэхэ охсуулаах. Туохпутун барытын атыылаһан, дуогабарынан өҥө оҥорторон олорор тэрилтэ буоллахпыт. Уу кэлиитэ буоллун, тоҕуллар убаҕаһы, эриллибит тобох үүтү оборторуу буоллун, сууларбыт-хааларбыт, преформаларбыт, таараларбыт, саппаас чаастарбыт – барытын атыылаһан, төлөһөн олордохпут. Элбэх нолуогу төлүүбүт. Үрүҥ аһы оҥорор тэрилтэ биир уратыта диэн кини сыл алта ыйыгар эрэ тигинэччи үлэлиир. Онтон хаалбыт алта ыйыгар ол үлэлээбиппит суотугар олоробут. Муус устарга, ыам ыйыгар, бэс ыйыгар, от ыйыгар, атырдьах ыйыгар, балаҕан ыйыгар соҕотуопка үлэтэ күүскэ барар”.
Инники балаһыанньалара хайдах буолара биллибэт да буоллар, кэлэктиип үтүө суобастаахтык үлэлии сылдьар. Собуот үлэтэ өрөспүүбүлүкэҕэ биллэр-көстөр. Араас бириистэргэ, наҕараадаларга, анал ааттарга тиксэллэр, дьаарбаҥка-быыстапкаларга кытталлар. Арыылаах-сыалаах үрүҥ аска үһүс буолбуттара. Елена Оконешникова бэйэтэ өрөспүүбүлүкэ ас-үөл индустриятын туйгуна ааты сүкпүтэ. Өрөспүүбүлүкэ өттүттэн бу кэлэктииби өйүүргэ туох эрэ хамсааһын наада эбит. Таһаарыылаах үлэлээх кэпэрэтиип өйөнүөхтээх.
«Саха сирэ» хаһыакка, edersaas.ru сайтка анаан
Майаттан Аркадий Иннокентьев.