Бүгүн Үөһээ Бүлүү улууһун Кэнтик нэһилиэгэр хаарбах туруктаах дьиэлэртэн көһөрүү бырагырааманан тутуллуохтаах үс мэндиэмэннээх таас уопсай дьиэ сыбаайата үөрүүлээх быһыыга-майгыга түһэрилиннэ.
edersaas.ru
Саҥа тутуу былаанынан 884 кв.м. иэннээх, 18 кыбартыыралаах буолуохтаах. Мантан 4 кыбартыыра олохтоох салайыныы бас билиитигэр, 14 кыбартыыра хаарбах туруктаах дьиэттэн көһөрүү бырагырааматынан чааһынай дьоҥҥо бас билиигэ бэриллиэхтээх. Тутууну «Строймонтаж» тэрилтэ (ген.дириэктэр Тумусов С.С.) 2021 сылга бүтэрэн, үлэҕэ киллэриэхтээх.
Кэнтик нэһилиэгэ улууспутугар сайдыыны кытта тэҥҥэ хардыылыыр, элбэх саҥа тутуулардаах, ыччат сөбүлээн олохсуйар, өрөспүүбүлүкэ атын нэһилиэктэригэр холобур буолар. Нэһилиэк баһылыга Валерий Валерьевич бу саҥа олоххо киириэхтээх үс мэндиэмэннээх уопсай дьиэ улуус нэһилиэктэригэр аан маҥнайгынан Кэнтиккэ тутуллар диэн тоһоҕолоон эппитин бар дьоно үөрэ иһиттилэр.
Саҥа тутуу түөрэҕэ түһэр бэлиэ күнүн, аал уоттарын уматан, сирдэрин-уоттарын аһатан, тутуу хаамыыта харгыһа суох, кэмигэр этэҥҥэ түмүктэнэригэр, олохтоохторго сылаас холумтаннаах иэримэ дьиэ буоларыгар көрдөһөн, алгыс сиэрин-туомун ыыттылар.
⠀
⠀⠀Мария Ущницкая, Үөһээ Бүлүү
edersaas.ru