Сыстыганнаах дьаҥ кэмигэр дьиэҕэ олоруу эрэсииминэн Кэбээйитээҕи «Сайдам» норуот айымньытын киинэ түөлбэнэн «Хомус биһигэ» диэн норуот маастара Артем Киренскай бирииһигэр хомуска оонньооччулар күрэстэрин тэрийэн ыытта.
edersaas.ru
Күрэх усулуобуйатын чэрчитинэн кыттааччылар хомуска биир матыыбы толорон, видеоҕа устан ыыттылар.
Куоластааһын түмүгүнэн элбэх куолаһы ылбыт оонньооччулар норуот маастарын бирииһигэр тигистилэр. Дьүүллүүр сүбэ кыттааччылары саастарынан арааран сыаналаата. Күрэс түмүгүнэн элбэх куолаһы ылан, Уйгууна Ефремова бастаата.
Киниэхэ маастар бэйэтэ таптайан оҥорбут хомуһа тигистэ. Уйгууна дьолугар алын сүһүөх кылааска хомуһу сэргиир учууталга Саргылана Кривошапкинаҕа түбэһэн, бэрт кыра сааһыттан умсугуйан дьарыктанар буолта. Уһуйааччынан Савелий Тимофеев буолар.
Улахан дьоҥҥо оскуола сааһыттан хомуска бэркэ оонньуур Ноябрина Киренская бастаата. Ноябрина маастар анал бирииһигэр тигистэ.
Артем Киренскэй – Кэбээйилэр баар суох күтүөппүт. Уус бэйэтэ туспа кистэлэҥнэрдээх. Уустук оҥоһуулаах хомуһу чочуйан оҥорууга Мандар, Кылыадьы уустартан уһуйуллубут биллэр-көстөр маастар.
«Саха сирэ» хаһыат, edersaas.ru анаан Татьяна МАКСИМОВА-ЛАЗАРЕВА,
Кэбээйи улууһа.