Быйыл бары улуустарга Патриотизм сылын араас тэрилтэлэр, биирдиилээн дьон хаһааҥҥытааҕар да элбэх үтүө санаа аахсыйатын тэрийэн саҕалаатылар.
edersaas.ru
Бу күннэргэ биир оннук аһымал аахсыйа Кэбээйи улууһугар бэрт тэрэһинннээхтик ыытыллан түмүктэннэ.
— Кэбээйи нэһилиэгэр «Сандаара» актыбыыс дьахталлар түмсүүлэрэ араас ис хоһоонноох үлэни ыытар тарбахха баттанар бастыҥ уопсастыбаннай тэрилтэнэн буолар. Кинилэр Саҥа дьыл иннинээҕи күннэргэ элбэх оҕолоох ыалларга, доруобуйаларынан хааччахтаах оҕолорго, инбэлииттэргэ, аҕам саастаахтарга «Үтүө санаа харыйата» аһымал аахсыйаны биллэрбиттэрэ. Бырайыак ааптара Кэбээйитээҕи оҕо спортивнай оскуолатын дириэктэрэ, «Сандаара» түмсүү чилиэнэ Наталья Сметанина.
Кини көҕүлээһинин улуус баһылыга Иван Левин, нэһилиэк баһылыга Андрей Кобяков, Кэбээйи нэһилиэгин тэрилтэлэрэ, дьокутааттар, биирдиилээн амарах санаалаах дьон өйөөн, актыбыыс дьахталлар 90-ча кэриҥэ бэлэҕи оҥорон тарҕаттылар, — диэн кэпсиир уопсастыбаннай кэрэпэндьиэн Татьяна Максимова-Лазарева.
«Үтүө санаа аахсыйатын чэрчитинэн оҕолорго, аҕам саастаах кырдьаҕастарбытыгар ыалынан сылдьан, соһуччу үөрүүнү бэлэхтээн, санааларын көтөхтүбүт, болҕомтобутун уурдубут. Оҕолор да, улахан да дьон наһаа үөрдүлэр, соһуйдулар.
Тус аадырыстаах бэлэх эмиэ үгүс. Саамай элбэх бэлэҕи «Кустук» оҕо уһуйаана оҥорбут.
Тэрилтэлэр үлэһиттэрэ, дьокутааттар эмиэ олус актыыбынайдык кытыннылар», — диэн «Сандаара» түмсүү чилиэннэрэ Александра Егорова уонна Кэбээйи орто оскуолатыгар иитии кафедратын салайааччыта Ирина Андреева санааларын үллэһиннилэр. «Сандааралар» хас да массыынанан сылдьан, бэлэхтэри дьиэлэринэн түҥэттилэр. Маныаха олохтоох дьаһалта салалтата көлө биэрэн өйөөтө. Актыбыыс дьахталлар түмсүүлэрэ нэһилиэккэ араас хайысхалаах үлэни тэрийэн ыытар, бэрт көхтөөх үлэлээх-хамнастаах дьон.
Бу иннинэ эрэ «Сандаара» көҕүлээһининэн нэһилиэк харыйатын киэргэтэргэ анаммыт «Саҥа дьыллааҕы оонньуур» аахсыйаҕа нэһилиэк олохтоохторун барыларын кэриэтэ хаппыттара. Бу ыытыллыбыт үлэ түмүгүнэн түмсүү бэйэтин усунуоһуттан кыайыылаахтарга, кыттааччыларга анал Махтал суруктары, өйдөбүнньүк бириистэри туттарбыттара, — диэн салгыы кэпсиир Татьяна Максимова-Лазарева.
Сахабыт сиригэр Патриотизм сыла киһи холобур оҥостор, киэн туттар араас үтүө дьыаланан саҕаланна. Ол туоһута бу — Кэбээйи нэһилиэгин актыбыыс-дьахталларын «Сандаара» түмсүүлэрин бастыҥ холобура. Биллэн турар, «сандааралар» Патриотизм сылыгар үгүс араас ис хоһоонноох үлэни ыыталлара чахчы.
Елена ПОТОЦКАЯ, «Саха сирэ» хаһыат, edersaas.ru
Хаартыска – «Сандаара» түмсүү архыыбыттан.