Кэбээйи олохтооҕо Андрей Левин сүөһү иитиитинэн дьарыктаммыта балачча буолла.
edersaas.ru
Эдэр киһи бааһынай хаһаайыстыбатын 160 төбөттөн саҕалаан тэриммит эбит буоллаҕына, үс сыл иһигэр сүөһүтүн ахсаанын 340 төбөҕө тиэртэ. Ыанар ынаҕа — 120 төбө.
Бу туһунан «Эдэр саас» саайт уопсастыбаннай кэрэспэдьиэнэ Татьяна Максимова-Лазарева бу курдук иһитиннэрэр:
— Андрей Левин былырыыҥҥыттан ыла сүөһү төбөтүн аайы харчы ылан, үлэлиилиригэр биллэ тирэҕирбит.
Эдэр пиэрмэр билиҥҥи туругунан икки хотонноох. Ынахтара 90 % төрөөтүлэр. Онон үлэтэ-хамнаһа эбиллэн, күн иллэҥэ суох. Тыа сирин үлэнэн хааччыйыыга эмиэ улаханнык үлэлэһэр. Ол курдук, кини хаһаайыстыбатыгар 15 үлэһиттээх.
Эдэр киһи дьиэ кэргэн пиэрмэтин сайыннарар соруктаах субсидия ылаары докумуон хомуйсар. Кини билигин үлэлии турар пиэрмэтигэр эбии ньирэйдэригэр анаан хотон тутар былааннаах. Ону сэргэ «эбии аһылык оҥорор тиэхиньэкэҕэ олус наадыйабын», — диир.
Кэбээйи улууһун кэскиллээх пиэрмэригэр баҕа санаата туоларыгар баҕарабыт.
Елена ПОТОЦКАЯ, «Саха сирэ» хаһыат, edersaas.ru