Бу күннэргэ Күөх Маайы көрсө Кэбээйи улууһугар араас көрүҥнээх интэриэһинэй куонкурустар ыытыллаллар.
edersaas.ru
Любовь Семенова дириэктэрдээх Кэбээйи сэлиэнньэтин култуурунай-сырдатар киинэ бииртэн биир сонун, киһи сүргэтин көтөҕөр күрэстэри толкуйдаан ыытар. Ол курдук, Күөх Маай бырааһынньыгын нэһилиэк олохтоохторо эмиэ урукку сыллар курдук, үөрэн-көтөн, бэрт түбүктээхтик көрүстүлэр. «Түннүгү киэргэтии» күрэскэ 20-чэ ыал көхтөөхтүк кытынна. Кинилэртэн үс ыал бириистээх миэстэҕэ тигистэ.
Бастакы миэстэни уһуйаан, оскуола үлэтигэр өрүү инники күөҥҥэ сылдьар көхтөөх ийэ, эбээ Полина Данилова дьиэ кэргэнэ ылла. Иккис миэстэҕэ «Сардаана» уһуйаан эдэр иитээччитэ Майя Павлова дьиэ кэргэнэ тигистэ. Үһүс бириистээх миэстэҕэ элбэх оҕолоох эдэр ыал, уопсастыбаннай олоххо өрүү инники кэккэҕэ сылдьар Илья уонна Альбина Левиннэр дьиэ кэргэттэрэ бэлиэтэннилэр.
Күрэс кыайыылаахтарыгар култуурунай-сырдатар киин салалтата бэйэтин бирииһин — харчынан бириэмийэни мобильнай баан нөҥүө тиксэрдэ.
Ити курдук, дьиэҕэ олорор эрэсиими тутуһан олорор дьоҥҥо култуура үлэһиттэрэ бырааһынньыктааҕы тыыны сахтылар.
«Саха сирэ» хаһыакка, edersaas саайтка анаан
Кэбээйиттэн
Татьяна МАКСИМОВА-ЛАЗАРЕВА.