Бу ый саҕаланыыта «Эдэр сааска» Карина Колесова — Каришка блогун саҕалаабыппыт. Блогу Карина ийэтэ Натальялыын суруйар.
Саҥа дьылынан!
Барыбытыгар саамай күүтүүлээх күндү бырааһынньыгынан Сана дьыл буолара буолуо дии? Мин эмиэ бу бырааһынньыгы сыл аайы олус долгуйа күүтэбин уонна саҥа кэлэр сылтан элбэҕи көрдөһөбүн.
Үүнэр 2019 саҥа сылы мин ийэбин кытта балыыһаҕа көрсөбүн. Ону биһиги хайыыр да кыахпыт суох, эмтэнэн, доруобай буолар туһугар тулуйарга тиийэбит. Ханна да буоллар, балыыһа да, дьиэ да буоллун, бырааһынньык син биир буолуохтаах. Мин ийэбин кытта саҥаттан-саҥа дьарыгы була сатыыбыт. Ийэм барахсан миэхэ анаан адвент-халандаар оҥорбута. Бүтүн ыйы быһа күн аайы сорудахтаах кэмбиэрдэрбин арыйабын уонна толоробун. Ол наһаа астык уонна интэриэһинэй. Мин араас сорудахтары толордум: Саҥа дьыл туһунан киинэ, мультик көрдүм, умнубат гына эҕэрдэлиэхтээх дьоммун испииһэктээтим, туустаах тиэстэттэн харыйаҕа ыйыыр оонньуурдары оҥордум, бастакыбын Хаарчаанаҕа сурук суруйдум уо.д.а. Сарсыарда буолла да долгуйа-долгуйа сорудахтаах кэмбиэрдэрбин арыйаары, толороору ыксыыбыт. Адвент-халандаары кытта бириэмэ түргэнник ааһар! Ол иһин мин ааҕааччыларбар итинник дьарыгы сүбэлиибин.
Маны таһынан, отделениебытын, хоспутун киэргэтэбит, бэйэбитигэр настарыанньабытын көтөҕөбүт, дьоммутугар, доҕотторбутугар эҕэрдэ сурук, бэлэх бэлэмниибит. Биир наһаа үчүгэй идеялаахпыт! Дойдубутуттан ыраах сылдьар буоламмыт маннык диэн санаатыбыт: хас биирдии күндүтүк саныыр дьоммутугар, дьүөгэлэрбитигэр эҕэрдэ суруйан буостанан ыытыахпытын баҕарабыт. Онон, доҕоттор, арай эһиэхэ Каришкаттан эҕэрдэ тиийдэҕинэ эһигини ахтар уонна таптыыр диэн билиэхтээххит! Үс сурутааччыбар эмиэ эҕэрдэ суруйан ыытыам, мин страницабын кэтээҥ.
Бу сурукпунан мин барыгытыгар тиэрдиэхпин баҕарабын — күүстээх санаалаах, сырдыкка, кэрэҕэ эрэллээх буолуҥ! Мин ийэм миигин күн аайы итинник диэн үөрэтэр, өйдөтөр. Саҥа кэлэр сыл биһиэхэ барыбытыгар үчүгэйи, кэрэни эрэ аҕалыа диэн күүтэбит уонна эрэнэбит! Аптаах түүн баҕа санааларгытын толордуҥ!
Каришка, edersaas.ru саайтка анаан.