Дьокуускайга Олимпиада үс төгүллээх чөмпүйүөнэ Александр Карелин кэллэ
Бүгүн, ахсынньы 25 күнүгэр, үс төгүллээх олимпийскай чөмпүйүөн, ГосДуума дьокутаата, Арассыыйа Дьоруойа Александр Александрович Карелин Дьокуускайга көтөн кэллэ. Кини манна Р.М. Дмитриев аатынан Олимпийскай эрэл училищетыгар гректии-римнии тустууга саала үөрүүлээх арыллыытыгар кыттыаҕа, салайааччылары кытта көрсүөҕэ, маастар-кылаас ыытыаҕа.
20-с үйэ аатырбыт спортсмена Александр Карелин: «Сырыым сүрүн сыалынан сиэрдээх тустууну көрдөрүү буолар, Саха сиригэр тустууну олус сэҥээрэллэрин, ытыктыылларын билэбин. Саха сирин кытта тустууну сибээстиибин — Роман Дмитриев, Павел Пинигин төрөөбүт дойдулара буолар. Өрөспүүбүлүкэҕит туһунан аан бастакыбын Иван Ярыгинтан истибитим. Манна сайын уонна кыһын кэлэ сылдьыбытым, көҥүл тустууга Арассыыйа чөмпүйэнээтин көрбүтүм. Ыччакка гректии-римнии тустуу өрүттэрин, албастарын көрдөрүөм, билиһиннэриэм», — диэн СИА кэрэспэдьиэнигэр кэпсээтэ.
Олимпийскай чөмпүйүөнү кытта гректии-римнии тустууга аан дойду икки төгүллээх уонна Европа чөмпүйүөнэ Александр Игнатенко, Новосибирскай уобалас спортивнай тустууга федерациятын бэрэсидьиэнэ Сергей Сёмка, вице-бэрэсидьиэн Юрий Токарев, дириэктэр Евгений Яхимович, «Карелин-Фонд» салайааччылара Юрий Середа, Олег Дозорцев, Олег Войтюк, Константин Круглянскай кэллилэр.
Делегацияны Ил Дархан уонна бырабыыталыстыба дьаһалтатын салайааччы Афанасий Владимиров, спорт миниистирэ Иннокентий Григорьев, миниистири бастакы солбуйааччы Семен Чердонов, Олимпийскай эрэл училищетын дириэктэрэ Алексей Филиппов көрүстүлэр.
СИА.
СИА хаартыскалара.