Саха уустара Егор Степанов уонна Алексей Андреев Канадаҕа Калгари аттыгар Лэйк Луиз куоракка тохсунньуга ыытыллыбыт муус оҥоһуктар күрэстэригэр бастакы миэстэни ылан, дойдуларыгар кыайыылаах-хотуулаах эргилиннилэр. Кинилэр мэтээл уонна Канада дуолларынан бириэмийэ өттүк харалаах кэллилэр.
edersaas.ru
«Канадаҕа муус оҥоһуктар күрэстэригэр сыл аайы кыттабыт, быйыл ахсыс сырыыбын баран кэллим. Айаммыт ороскуотун барытын бэйэбит уйунабыт. Америкаттан, Европаттан, Азияттан саамай бастыҥ хамаандалар түмсэн, күөн көрүстүбүт. Онно тиийэн тылбаасчыта суох хайдах сатыырбытынан английскайдыы кэпсэтэбит, дьону кытта өйдөһөбүт.
Муус оҥоһуктарбытын норуот үһүйээннэригэр олоҕуран оҥоробут, быйыл хотугу норуоттар остуоруйаларын ис хоһоонун арыйдыбыт. Таба күнү уоран барбытын табаһыт уол эккирэтэн, дойдутун унньуктаах уһун хараҥаттан босхолуур. Биллэрин курдук, Уһук Хоту кыһыҥҥы ыйдарга күннэрэ суох.
Муус оҥоһуктарынан идэтийэн туран дьарыктаммыппыт 25 сыл буолла, өрөспүүбүлүкэ күрэхтэрин көтүппэккэ кыттар этибит, онтон бу аан дойду таһымыгар таҕыстыбыт», — диэн Егор Степанов кэпсиир.
Устудьуоннуу сылдьан 1995 сыллаахха уолаттар Ленин болуоссатыгар бастакы оҥоһуктарын оҥорбуттара онтон кынаттанан, Арассыыйа, Аляска, Италия, Канада күрэхтэригэр кыттар, миэстэлэһэр буолбуттара.
Марианна Тыртыкова, «Саха сирэ», edersaas.ru