«Кыайыы 50 сыла» успуорт киинин саалатыгар мээчик тигинээн олорор. Сааланы икки аҥыы аҥаардаан баран, дьахталлар уонна эр дьон хамаандалара тус туспа волейбол оонньууллар. Сэргэхтэрэ, сэниэлээхтэрэ сүр. Мээчиги сиргэ түһэримээри ыстаныы, үөһээ күөрэтии… Мин бүтэһикпин устудьуоннуур сылларбар волейбол оонньообут киһи, көрөн наһаа сөхтүм уонна испэр ыраастык ымсыыра санаатым.
«Хаһааҥҥыттан маннык түмсэн оонньуур буолбуккутуй», — диэн ыйытыыбар бэтэрээн оонньооччуларга (дьахталларга) хамаанда хапытаана Варвара Еремеева маннык кэпсээтэ:
— Оҕо эрдэхпиттэн волейболлуурбун наһаа сөбүлүүр этим. Мээчик тыаһын иһиттим да, сүрэҕим тэбэрэ кытта күүһүрэр буолара. Ол иһин, волейбол оонньуур баҕаттан, бастаан бэтэрээннэр уонча буолан мустубуппут. Онтон сыыйа элбээн «Виктория» уонна «Урожай» диэн кулууптар тэриллибиттэрэ. Бастаан оонньуур сирбит көстүбэккэ кыһалҕалана сырыттахпытына, бэтэрээннэр профсойуустарын сэбиэтин нөҥүө Святослав Григорьев диэн волейбол фаната, байаанныыр, ыллыыр, быһата наһаа көхтөөх киһи, кини кэпсэтэн бу успуорт киинигэр оонньообуппут номнуо уонча сыл буолла.
Биһиги волейбол күрэхтэһиилэригэр барытыгар көхтөөхтүк кыттабыт. Бэйэбит туспа түмсүү курдук биир сүбэнэн дьарыктанабыт, алтыһабыт. Бырааһынньыктарга эҕэрдэлэһэбит. Сааһыран баран үлэлиир да буоллахха, бочуоттаах сынньалаҥҥа тахсыбыт киһиэхэ уопсастыба наада дии саныыбын. Биһиги нэдиэлэҕэ иккитэ мустан мээчиги күөрэтэн астынабыт, сэргэхсийэбит. Ол курдук, куорат иһинэн уонна өрөспүүбүлүкэ таһымнаах улахан күрэхтэһиилэргэ сылдьан бириистээх миэстэлэргэ тиксэн турабыт. «СахаВА» күрэхтэһии сыл ахсын ыытыллар. Биһиги бэтэрээннэр икки ардыларыгар күрэхтэһэн ааспыт сылга бастакы миэстэҕэ тиксибиппит. Ону таһынан, сыл ахсын Арассыыйа үөрэҕириитин бочуоттаах үлэһитэ, ИФКиС туйгуна, «СахаВА» бочуоттаах маастара Зинаида Афанасьева бирииһигэр волейбол турнира буолар. Кини ордук волейболу успуорт көрүҥүн быһыытынан улуустарга пропагандалыырга күүстээх үлэни ыытар. Ол иһин улуустартан кыттар хамаандалары ордук биһириир. Кыттар баҕаттан биһиги, бэтэрээннэр, хамаандабытын Таатта улууһун аатыттан туруорбуппут. Маны таһынан куорат лигатыгар эмиэ кыттыыны ылбыппыт. Уопсайа бу лигаҕа 50-ча хамаанда баар. Араас саастаах хамаандалары кытта оонньообуппут. Соторутааҕыта Таатта улууһун Чөркөөх нэһилиэгэр баран волейбол оонньоон кэллим. Ырыаһыт Виталий Власов аҕатын аатынан улахан турнир буолан ааста. Мин куораттан бэтэрээннэр хамаандаларын аатыттан соҕотох тиийбитим уонна Уус Тааттаттан, Дьохсоҕонтон, Ытык Күөлтэн дьахталлары түмэн туспа хамаанда тэринэн кытынныбыт. Көххө эдэрдэри кытта оонньоотубут. Бэйэбитин көрдөрөн, сэргэхсийэн аҕай кэлбиппит.
Сааһырдыбыт диэн санаабытын түһэрбэппит. Эдэрдии эрчимнээхтик волейбол оонньоон мээчиги күөрэтэбит. Киһи сааһыран истэҕин ахсын сөбүлүүр дьарыгар хайаан да быыс булан бириэмэтин аныахтаах. Мин оҕо сааһым таптала — волейбол күөрэйэр мээчигэ, билиҥҥэ диэри сүрэхпин үөрдэр, санаабын кынаттыыр. Мээчиги эккирэтэн билигин бу 66 сааспар диэри оонньуурбунан астынабын. Онон бэйэм саастыылаахтарбар сүбэлиэм этэ, дууһалыын эдэрдик сананыҥ, ыалдьар да буоллахха, санааны күүһүрдэн үчүгэйи эрэ ыраланнахха, ол барыта туолар. Успуорду өрө тутуҥ, дьарыктаныҥ, мээчиктээҥ диэн аҕа саастаах көлүөнэни ыҥырабын!
Ульяна ЗАХАРОВА.