Көрөөччүлэр “Саҥа ырыаны” ахтыбыттар

Бөлөххө киир:

Икки сыл курдук тохтуу сылдьан баран, “Саҥа ырыа” интерактыыбынай ырыа күрэҕэ  Саха сирин олохтоохторун – сахалыы ырыаны таптааччыларын, ырыаҕа сүгүрүйээччилэрин болҕомтолорун эмиэ тарта. www.edersaas.ru

“Сахам сирин халлааныгар саҥа сулус сандаарыйдын!«

Ол курдук, быйылгы куонкуруһу “Саха” НКИХ уонна СӨ Судаарыстыбаннай эстрада тыйаатыра кыттыһан тэрийдилэр. Бырайыак ааптара – Петр Пестряков, режиссер Татьяна Чаранская, дьүүллүүр сүбэ бэрэссэдээтэлэ – Эстрада тыйаатырын дириэктэрэ Алексей Егоров-Өркөн. Петр Пестряков интервьютун манна сиһилии билсиҥ.

Биллэрин курдук, сүүмэрдиир түһүмэхтэр Дьокуускайга ый анараа өттүгэр ыытыллыбыттара. Онно 100-чэкэҕэ чугаһыыр сайаапка киирбититтэн, дьүүллүүр сүбэ 30 бастыҥ диэбит ырыатын талан ылбыта.

Дьэ онон, ахсынньы 1-2 күннэригэр “Саҥа ырыа- 2016-2017” кыттыылаахтарын куонкурустаһар ырыаларынан уонна урукку сыллардааҕы хит буолбут ырыаларынан Суорун Омоллоон аатынан Опера уонна балет тыйаатырыгар бэрт сэргэх, үчүгэй кэнсиэрдэр буолуталаатылар, оттон ахсынньы 2 күнүгэр 20 чаастан ырыа күрэҕин кыттыылаахтарын, “Саҥа ырыа” араас сыллардааҕы кыайыылаахтарын – эстрада сулустарын Саҥа Дьыллааҕы бырагыраамаларынан бырааһынньыктааҕы кэнсиэр тыйаатырга көрөөччүлэри эмиэ сааланы тобус-толору муста.

Тыйаатыр саҥа быыһа аһыллаатын кытта – Саҥа Дьыл алыптаах бырааһынньыгынан киэркэйбит сценаттан муусука, уот-күөс, күлүү-салыы, үөрүү-көтүү  саалаҕа кутулла түһэр: Айгылаан кэм даҕаны мэниктии сылдьар, Сахаайа чочуонай атахтарыгар балетнай пуанталаах – тарбахтарын төбөтүгэр турар, оттон Надина саҥа ааттарга бэлэҕин кичэйэн суулаабытынан, Тамара үчүгэй бэрээдэктээҕинэн ыытааччылартан хайҕабыл ылаллар…  Ити курдук, сүүрүү-көтүү, бырааһынньыктааҕы сүпсүлгэн кэнниттэн арыый уоскуйан – кэнсиэр саҕаланар…

Манна быһа түһэн бэлиэтиэм этэ – кэнсиэр – көрөөччүлэргэ Саҥа дьыллааҕы сүрпүрүүс, бэлэх кэриэтэ буоллаҕа, ол иһин, сэкириэти эрдэттэн аспаппын – ким ханнык ырыаны хайдах ыллаабытын кэпсээбэппин – бэйэҕит бырааһынньык күннэргэ тэлэбиисэргэ үөрэ-көтө көрүөххүт!

Арай этиэ эбиппин – манна саҥа ааттары кытта “Саҥа ырыа” араас сыллардааҕы кыайыылаахтара – холобур, 2004 сыллаахха “Саҥа ырыа” аан бастакы кыайыылааҕа (“Барбыт киһи…”) Тамара Попова, 2008 сыллаахха 48 тыһыынча (!) куолаһы ылан, эрэллээхтик бастаабыт, айылҕаттан айдарыылаах Далаана, онус, үбүлүөйдээх ырыа күрэҕин кыайыылааҕа Виталий Очиров, бу куонкурустан куорсун анньынан, ситиһиилэрэ элбээбит “Кофе” дуэт – Даша уонна Паша, эйэлээх Эрчим, Санита Ай уонна Эрхан, Нарыйаана-Куо уонна Антон Иванов, Сахамин, “Саха сирин көмүс куолаһа” Сахаайа, уо.д.а. бааллар. Кинилэр саҥа ааттарга — Намыынаҕа, Ирина Неустроеваҕа, Дмитрий Ефремовка, Лараҕа уонна “Арчы” дуэкка, Арчылаанаҕа уонна Сергей Сорокиҥҥа, Лоокуукка, Александра Старостинаҕа, Ванска, Айыллаанаҕа, Күндэлгэ, Анна Ларедоҕа, Юлиан Семеновка, Уол Сомоҕоҕо, Айсен Аммосовка, Сатабылга, Сосо Томскайга, Айар Стручковка, о.д.а., алгыс тылларын этэн туран, бэлэхтэрин туттардылар.

Аны тэрийээччилэр, кыттааччылар уонна көрөөччүлэр санааларын билсэ түһүөҕүҥ.

Петр Пестряков, Эстрада тыйаатырын продюсера, бырайыак ааптара:

— Быйылгы “Саҥа ырыа” уратытытынан, эбиллиитинэн диэххэ сөп – урут хаһан эрэ биһиги, 8-с сезон кыайыылааҕын Июлина Попованы Федор Шаляпин аатынан Норуоттар икки ардыларынааҕы куонкуруска ыыта сылдьыбыппыт, онуоха кини Гран при ылан кэлбитэ, онтон санаа-толкуй  киирэн, куоластааһын уонна дирекция быһаарыытынан, чахчы дьоһуннаах ырыаһыт таҕыстаҕына, Россия биир саамай ааттаах-суоллаах музыкальнай куонкуруһугар кытыннара ыытар баҕа санаалаахпыт.

Сахаайа, СӨ үтүөлээх артыыһа, дьүүллүүр сүбэ чилиэнэ:

— Сүүмэрдиир түһүмэх алтынньыга икки күнү быһа барбыта. Дьүүллүүр сүбэҕэ Өркөн – бэрэссэдээтэл, Виталий Андросов, Бүөккэ Бөтүрүөп уонна мин буолан, саҥа ырыа, саҥа ааттар, саҥалыы көстүү тахсарын туһугар үлэлээн, элбэх ырыаттан 30-тун талан ыллыбыт. Наһаа үчүгэй оҕолор, киһи “һык” гына түһэр таһымнаах толоруулар, ырыалар бааллар. Саха эстрадатыгар сайдыы баар. Сорохторо хайыы-үйэҕэ бэйэлэрэ бэлэм артыыстар…

Виталий Андросов, композитор, СӨ култууратын үтүөлээх үлэһитэ, дьүүллүүр сүбэ чилиэнэ:

— Киһи ырыа дьылҕата хайдах буолуон эрдэттэн билбэт… Ол гынан баран, норуот ырыаларыгар тирэҕирбит, дьиҥ сахалыы тыыннаах ырыалар бааллар, киһи сөбүлүү истэр, олор тахсыахтара дии саныыбын…

Айсен Аммосов, кыттааччы:

— Мин хомусчут буоллаҕым, оттон бу “Саҥа ырыаҕа” бэйэбин эстрада ырыаһытын быһыытынан холонон көрөр санааттан, кытынным. Ийэм Матрена Аммосова тылларыгар уонна мелодиятыгар “Күөрэгэй” диэн ырыаны саҥалыы тыыннаан толордум. Куонкурус тэрээһинэ үчүгэй. “Саҥа ырыаны” уруккуттан хас сыл аайы тэлэбииһэринэн олус сөбүлүү, ымсыыра да көрөр этим, онон, бу – ыра санаам, баҕа санаам туолуута, диэхпин сөп.

Римма Антонова, көрөөччү:

— Талааннаах ыччаттар бааллара үөрдэр. Мин үчүгэй сахалыы ырыа сүгүрүйээччитэ буолабын, кыах көһүннэр эрэ, кэлэн истэбин. Бу кэнсиэр олус үчүгэй, ол эрээри, ардыгар муусуката олус улаатар дуу, ырыа тыла иһиллибэт буолан ылаттыыр. Оттон уопсайынан эттэхпинэ, бу “Саҥа ырыаны” икки сыл устата ахтыбыппын…

 

Аны сотору кэминэн, “Саҥа ырыа” куонкурус, дьэ өссө уутугар-хаарыгар киириэҕэ – тохсунньу, олунньу ыйдарга тэлэбииһэринэн көрөөччүлэр сөбүлүү көрбүт-истибит ырыаһыттарын “СМС” иһитиннэриинэн өйүүллэрин, биһирииллэрин биллэриэхтэрэ.

Татьяна Маркова.

Николай Ефремов хаартыскалара

+1
0
+1
0
+1
0
+1
0
+1
0
+1
0
+1
0