Ньурба улууһугар 54-с сылын үөрэх дьылын түмүктүүр Күндээдэ оҕо саада былырыын күһүн саҥа дьиэҕэ киирбитэ. Уһуйаан иитиллээччилэрэ бэрт сэргэх, көхтөөх дьон. Быйыл саас төһө да дьиэҕэ олордоллор, араас таһымнаах күрэстэргэ бэрт ситиһиилээхтик кыттыбыттар.
edersaas.ru
Саамай улахан кыайыыларынан Бүтүн Арассыыйатааҕы “Лего” конструкторын таҥыыга чөмпүйэнээт өрөспүүбүлүкэтээҕи түһүмэҕин кыайыылааҕынан буолбуттарын ааттыыллар. Оттон бу күннэргэ уһуйааҥҥа “Выпускниктар аллеялара” баар буолла.
Ол туһунан сэбиэдиссэй Венера Ивановна Степанова кэпсиир:
— Быйыл биһиги уһуйааммытыттан 6 оҕо оскуолаҕа барар. Кинилэр сабыс—саҥа дьиэбит бастакы выпусниктарын аатын сүгэн, кыраһыабай, киэҥ-куоҥ тиэргэммитигэр бастакынан «Выпусниктар аллеяларын» олохтоотулар. Ол курдук, аҕалар бэлэмнээбит хатыҥнарын оҕолор ийэлэрин кытта тус—туспа чааһынан болдьоһон кэлэн, үөрэ-көтө, бэрт эппиэтинэстээхтик олортулар. Хатыҥчааннарыгар «Силигилии үүнээр!» диэн баҕа санааларын кытта ааттара суруллубут туоһу бэлиэни баайдылар.
Хатыҥнар саас аайы тыллан, сэбирдэхтэрэ, лабаалара элбээн, сиртэн күүс ылан, ситэн-силигилээн, баараҕадыйан иһэллэрин курдук, оҕолор сылтан сыл улаатан, күүһүрэн, билии эбинэн, сайдан-үүнэн иһиэхтэрэ. Хатыҥ чараҥ чэлгийэн, бөһүөлэги киэргэтэрин курдук, улааппыт оҕолор үтүө дьыалаларынан, ситиһиилэринэн төрөөбүт дойдуларын ааттата, киэргэтэ сылдьыахтара турдаҕа…
Ангелина Васильева, “Саха сирэ” хаһыат, edersaas.ru
Хаартыска: В.И. Степанова түһэриитэ.