Бүгүн – Ылдьыын. Күнүскэ чэйгэ диэри – сайын, онтон киэһэ күһүн саҕаланар дииллэр. Бурдук буһар, көччөх (кус оҕото) көтөр.
edersaas.ru
Ол гынан баран, саа үрдүгэр түһэргэ өссө даҕаны эрдэ. Булт сокуонунан, күһүҥҥү куска сааланыы сыл аайы атырдьах ыйын үһүс субуотатыттан көҥүллэнэр. Халандаарга көрдөххө, ити болдьох саҕаланар кэмэ быйыл атырдьах ыйын 18 күнүгэр түбэһэр. Онон, сааһыттары өссө ый аҥаара тулуйа сатыыргытыгар сүбэлиибит. Бэйэҕит билэҕит: ыстараап улаатан-кытаатан, сокуону кэстэххитинэ — ыстаана да, саата да суох хаалыаххытын сөп.
Киин куорат олохтоохторугар кус булдугар көҥүлү 202-с түөлбэ 18/2 №-дээх дьиэтигэр Дьокуускай куораттааҕы айылҕа харыстабылын кэмитиэтэ биэрэр итиэннэ, бүтэһиктээх быһаарыы ылылла илик гынан баран, Курашов аатынан уулусса 46-с №-гэр (“Туймаада-Нефть” НХ баар дьиэтин кэтэх өттүгэр олбуор иһинэн киириллэр) Экология министиэристибэтин биологическай ресурсаларга уонна айылҕа ураты харыстанар сирдэригэр дириэксийэтэ биэрэрэ күүтүллэр.
Василий НИКИФОРОВ, edersaas.ru