«Күһүҥҥү киһи күлбүтүнэн» көөчөөн көрө тардылынна

Ааптар: 
Бөлөххө киир:

Таатта улууһугар, Чымынаайыга, «Күһүҥҥү киһи күлбүтүнэн» улуустааҕы көр-күлүү аһаҕас куонкуруһа иккис сылын ыытылынна.  Тыа сирин дьоно-сэргэтэ түбүктээх үлэлэрин-хамнастарын быыһыгар сөптөөхтүк дьүөрэлии тутан, дьону-сэргэни күллэрэн аралдьытар, сылааларын таһаарар, үйэлэрин уһатар бэртээхэй куонкурустара үрдүк таһымнаахтык буолла диэн Дьохсоҕонтон Алампа аатынан норуот айымньытын дьиэтин уус-уран салайааччыта Анна Константинова иһитиннэрэр.


—Быйылгы күөн күрэскэ Чөркөөх, Дьохсоҕон, Дэбдиргэ, Чымынаайы, Туора-Күөл бэтиэхэлэрэ уонна Чурапчы Мындаҕаайытыттан «Быара суохтар»  мини-тыйаатырдарын бөлөҕө көхтөөхтүк кытыннылар. Сценкалар сыллата тупсан, бөлөхтөр толоруулара, маастарыстыбалара үрдээн иһэрэ тута көстөр. Онон куоталаһыы да олус сытыытык барда. Уопсайа 20 нүөмэр көрдөрүллүбүтүттэн, түмүктүүр улахан кэнсиэргэ 13 чаҕылхай нүөмэр сүүмэрдэнэн киллэрилиннэ.

Дьон-сэргэ бу бэртээхэй дьоро күнү кэтэһэ үөрүйэхтэммитэ биллэр. Саалаҕа толору мустубут көрөөччүлэр хас биирдии сценкаҕа күлэн «быардарын тарбаатылар», дохсун ытыстарын тыаһынан хас биирдии нүөмэри арыаллаанннар, артыыстары көҕүлээн, санааларын күүһүрдэн биэрдилэр.

Дьүүллүүр сүбэҕэ Майаттан Аркадий Новиков  аатынан «Көөчөөн көрө»  мини-тыйаатыр артыыстара, салайааччы Анна Охлопкова олорон хас биирдии кыттааччылары, нүөмэрдэри болҕойон көрдүлэр-иһиттилэр. Куонкурус түмүгэр тэрээһин кыттыылаахтарын бука барыларын түмэн сценкалары биирдии-биирдии ырыттылар, ыйыы-кэрдии, сүбэ-ама биэрдилэр, санаа үллэстиитэ сэргэх буолла.

Киэһээҥҥи бэртээхэй, сэргэх, күлүүлээх-салыылаах кэнсиэр кэнниттэн, үөрүү-көтүү аргыстаах наҕараадалааһын, тыл этиитэ буолла. Быйылгы күрэс кыайыылаахтарынан Чурапчыттан кэлбит ыалдьыттарбыт, «Быара суохтар» буоллулар. Кинилэргэ Тааттатааҕы «Уйгу» маҕаһыын аатыттан 10 000 суумалаах сэртипикээт туттарылынна, эҕэрдэ эриэккэһэ этилиннэ. Мындаҕаайылар «айаммыт-сырыыбыт табылынна» диэн наһаа үөрбүттэрин, долгуйбуттарын биллэрдилэр, тэрийээччилэргэ махтаннылар. Биһиги, дьохсоҕоттор, көрдөөх дьоммут бөлөҕүн салайар Иннокентий Баснаев сүбэтинэн, түмүүтүнэн ох курдук бэлэмнэнэн, кустук курдук куоһанан алта буолан кыттаммыт, ситиһии көтөллөннүбүт. «Быары тарбааччылар» анал аакка тиксэн, дохсун ытыс тыаһынан арыалланныбыт.  Манна даҕатан эттэххэ, салайааччыбыт оҕо сааһыттан сыанаттан түспэт артыыспыт. Кини «Уол оҕото» диэн анал ааты ылыан ылан, дьохсоҕоттор үөрүүбүт-көтүүбүт өссө үрдээтэ. Анал ааты ылбыт дьон санаабыт улаханнык көтөҕүлүннэ.  Онон, түгэнинэн туһанан, ыҥырдыбыт да сүүрэн кэлэр, үөрүүнэн кыттар, болҕомтону тардар дьоммутугар Антонина Никоноваҕа, Алена Поповаҕа, Наталья Поповаҕа, култуура бэтэрээнигэр Анна Ючюгяеваҕа улахан махталбытын тиэрдэбит. Былааммыт, баҕабыт өссө кэҥээн, улаатан иһэр. Оттон маннык ситиһии биһиэхэ тирэх буолар. Билигин күөн күрэстэргэ саҥа көрдөөх туруорууларбытынан өссө турунан кыттыахпыт дэстибит.

Биһиги корр., «Саха сирэ» хаһыат, edersaas.ru

 

+1
0
+1
0
+1
0
+1
0
+1
0
+1
0
+1
0