Өймөкөөн ыччакка отделын салайааччыта Станислав Григорьев Өймөкөөҥҥө өрөспүүбүлүкэтээҕи Ыччат ыһыаҕын бэрт ситиһиилээхтик ыытыаҕыттан ыла, ыччат политикатын суруйар суруналыыстар биир олус убаастанар уонна күүтүүлээх ыалдьыппыт.
Елена ПОТОЦКАЯ, «Саха сирэ» хаһыат, https://edersaas.ru
Ол курдук, “Саха сирэ” хаһыат “Эдэр саас” сыһыарыыта уонна Саха араадьыйатын ыччакка аналлаах биэриитэ Станислав Григорьев куоракка кэлбит сураҕын иһиттилэр да, кинини матырыйаалларын бастыҥ дьоруойунан оҥостоллор. Онуоха, арааһа, кэнники сылларга Өймөкөөн ыччата Ыччат ыһыахтарыгар бириистээх миэстэлэри мүччү туппата да “охсоро” буолуо.
Өймөкөөҥҥө Ыччат сылын үөрүүлээх аһыллыыта олунньу 3 күнүгэр буолар. Бүгүн ол бэлиэ тэрээһининэн сибээстээн, Станиславы кытта кэпсэтэбит.
Ыччат сөбүлээтэҕинэ олохсуйар
Кэлиҥҥи сылларга Өймөкөөҥҥө эдэр исписэлиистэр хото олохсуйан эрэллэр. «Ол аата кэлии ыччат Тымныы полюһун сөбүлээбит», — диэн бэлиэтиир Станислав Григорьев. Кырдьык, аҥардас улуус киинигэр Уус Ньараҕа өрөспүүбүлүкэ киин улуустарыттан кэлбит эдэр исписэлиис биллэ элбээтэ. Ол да иһин буолуо, Уус Ньараҕа эдэр исписэлиистэр түмсүүлэрэ бэрт көхтөөхтүк үлэлиир.
Станислав Үчүгэй нэһилиэгэр Үөрэх министиэристибэтин кытта олорор дьиэҕэ дуогабардаһан кэлэр ыччаттары холобурдаата. «Манна эдэр учууталлар үөрэхтэрин бүтэрээт, дуогабарынан кэлэн үлэлииллэр. Онтон дуогабардарын биэс сылын болдьоҕо туолаатын кытта, кинилэри аны атын исписэлиистэр солбуйаллар. Инньэ гынан, биэстии сыл буола-буола, сибиэһэй күүс бэйэ-бэйэтин солбуйсан иһэр. Ол, биллэн турар, олохтоох нэһилиэнньэ сайдыытыгар олус туһалаах», — диэн санаатын үллэстэр ыччат лиидэрэ.
Уопсастыбаннай үлэҕэ көҕүлээһин
Кэлиҥҥи сылларга улуустарга араас хайысхалаах коммерческайа суох тэрилтэлэр тэриллэн эрэллэр. Өймөкөөн улууһугар, кэрэхсэбиллээҕэ баар, ыччат ортотугар маннык уопсастыбаннай тэрилтэ ахсаана элбиир. Муниципалитет ыччакка отделын салайааччыта Станислав Григорьев социальнай хайысхалаах ыччат уон тэрилтэтэ регистрацияланан эрэрин туһунан үөрэ кэпсиир. Ол курдук, Сордоҥноохтон “Ыллык”, Үчүгэйтэн “Дабаан”, Уус Ньараттан “Спарта”, Төрүттэн “Индэл” курдук ыччат түмсүүлэрэ коммерческайа суох тэрилтэ быһыытынан регистрацияны ааһарга докумуоннарын туттарбыттар. Онон араас улахан үбүлээһиннээх граннарга бу түмсүүлэр хото кыттар кыахтаныахтара диэн бэлиэтиир ыччат лиидэрэ. Бачча элбэх коммерческайа суох тэрилтэ биир сомоҕо буолан, араас үлэни ыыттаҕына — олус бэрт хамсааһын буолуо!
Биэс дьоллоох дьиэ кэргэн дьиэҕэ тигистэ
Өймөкөөн улууһугар 2007 сылтан ыла 18-35 сааһыгар диэри ыччакка “Олорор дьиэ” анал бырагыраамаҕа олоҕуран, дьиэ тутталларыгар субсидия көрүллэр. Бу бырагыраамаҕа улуус муниципалитетын бүддьүөтүттэн 3 мөл. солк., өрөспүүбүлүкэттэн – 2,5 мөл. солк. көрүллэр. Тоҕус сыл устата улууска дьиэ тутуу субсидиятынан 22 эдэр ыал туһанан, саҥа дьиэҕэ киирии малааһынын тэрийбит.
Кэлиҥҥи кэмҥэ араас нэһилиэктэртэн биэстии ыал анал бырагыраама тустаах өйөбүлүнэн туһанна. Быйыл саҥа дьиэ туттарга субсидия харчытынан Өймөкөөнтөн элбэх оҕолоох соҕотох ийэ Екатерина Борисова, Уус Ньараттан элбэх оҕолоох ыал Евдокия уонна Владислав Кургановтар, эдэр ыаллар Надежда уонна Павел Дягилевтар, Елена уонна Павел Горбуновтар, Томтортон Валентина уонна Николай Корниловтар туһаннылар. Биллэн турар, саҥа дьиэ туттубут дьон олохтоохтук тэринэн олохсуйа хаалаллара чахчы. Онон улууска сис ыал буола тэнийэр кэскили бу маннык абыраллаах бырагыраама түстүүр.
Иллэҥ кэми — туһалаахтык
Соторутааҕыта улуус киинигэр эдэр исписэлиистэр түмсүүлэрэ Киинэ сылыгар аналлаах брейн-ринг тэрийэн ыытта. Түөрт хамаанда: улуус киинин үлэлиир ыччата, социальнай харысхал управлениетын уонна улуус дьаһалтатын эдэр исписэлиистэрэ, Игорь Хоменко аатынан орто оскуола учууталлара дойду киинэтин классикатынан буолбут киинэлэргэ анаммыт куонкуруска кимиилээхтик кииристилэр. Хамаандалар бары билиилэрэ-көрүүлэрэ чаҕылхай буолан биэрдэ. Дьүүллүүр сүбэ 1-кы миэстэни улуус киинин үлэлиир ыччатыгар анаата. 2-с миэстэҕэ учууталлар таҕыстылар. 3-с миэстэҕэ муниципалитет дьаһалтатын эдэр исписэлиистэрэ тигистилэр.
Ыччат сылыгар – кэскиллээх былаан
Ыччат сылын чэрчитинэн Стас Григорьев Саха араадьыйатыгар улууска Ыччат спартакиадатын ыытар былааннаахтарын “сэгэттэ”.
«Сыл түмүгүнэн спортивнай күрэхтэһиилэргэ кыайбыт нэһилиэк ыччаттарын түмсүүтүгэр харчынан сертификат туттарыахпыт», — диэн санаатын үллэһиннэ Станислав. Маны тэҥэ кини улуус ыччатын ыһыаҕын тэрийэр, устудьуоннары өйөөн, кинилэргэ анал истипиэндьийэ аныыр баҕа санаалаахтарын туһунан эттэ. Ону тэҥэ, быйыл “Эдэр саас” хаһыат “Саха ыччатын – промышленноска” бырайыагын өйөөн, аны күһүн ыстарааталлар артыалларын үлэлэрин өрөспүүбүлүкэ ыччаттарыгар билиһиннэрэр баҕалаах. Кырдьык да, кэскиллээх толкуйдар.
Станислав Григорьев улууһун инники күөҥҥэ илдьэр эдэр кэскиллээх салайааччы. Былырыын Ыччат баалыгар “Ыччаты кытта үлэҕэ бастыҥ исписэлиис” диэн номинацияҕа бары улуустартан чорботон бэлиэтээбиттэрэ да кини туһунан үгүһү этэр.
Елена ПОТОЦКАЯ, «Саха сирэ» хаһыат, https://edersaas.ru