Өймөкөөн улууһун олохтоохторун термометрдара бүгүн -70 кыраадыһы көрдөрдүлэр!
Бүгүн Өймөкөөн улууһугар өр сылларга бэлиэтэммэтэх тымныы түстэ.
edersaas.ru
Ол курдук, бу сарсыарда Үчүгэй нэһилиэгин олохтоохторун термометрдара маннык кыраадыһы көрдөрдө!
Оттон Биэрэк Үрдүгэр -62 кыраадыс бэлиэтэннэ. Өймөкөөн улууһун нэһилиэктэрин олохтоохторун батсаапка кэпсэтиилэрэ бу сарсыардаттан тымныы тула буолла. Үгүс нэһилиэктэргэ 60-тан тахса кыраадыс тымныйбыт! Онон бүгүн Өймөкөөҥҥө -50 кыраадыс тымныы «сылаас» категорияҕа киирдэ. Оттон «Халыма» трассатыгар — 70 кыраадыстан тахсыбыт. Ол курдук, Элги өрүс эҥэригэр суоппардар термометрдара -71 көрдөрбүтүн батсаапка видеоҕа уһулан ыыттылар. Суоппардар барахсаттар, тымныыга массыыналара тохтоон хаалан, маатыра булкаастаах уордайыыларын туһанар кыах суоҕуттан бэчээккэ туһамматыбыт.
Онон бүгүн Тымныы полюһугар Өймөкөөҥҥө тымныыны анаан эккирэтэн кэлбит уонтан тахса Италия, Кэриэйэ уонна Польша туристарын баҕа санаалара туолла!
Елена ПОТОЦКАЯ, «Саха сирэ» хаһыат, edersaas.ru
Хаартыска — социальнай ситимнэртэн.