РФ Силиэстийэлиир кэмитиэтин Саха сиринээҕи управлениетын салайааччыта Александр Заболиченко «Өймөкөөн улууһа» муниципальнай тэриллии баһылыга Михаил Захаровка холуобунай дьыала тэрийдэ.
РФ Холуобунай кодексатын 285-с ыст. 2-с чааһынан, ол эбэтэр, дуоһунас боломуочуйатынан туһаныы бэлиэтэ баарынан.
Силиэстийэ сабаҕалыырынан, 2013 сыллаахха улуус баһылыга Уус Ньара бөһүөлэгэр баар кыбартыыраны тус бэйэтигэр ылаары, муниципальнай наадаҕа диэн кыбартыыра ыларга муниципальнай хантараак түһэрсэр быраабы биэрэр аһаҕас аукциону тэрийбит.
Аукцион ыытыллыбатах, онуоха баһылык өрөспүүбүлүкэ үпкэ миниистирин аатыгар сурук суруйбут. Кыбартыыраны муниципальнай тэриллии наадатыгар ыларга диэн докумуоннарга сөбүлэҥ биэрэллэригэр. Маныаха баһылык кыбартыыраны бэйэтигэр ылар баҕалаах эбит.
СӨ Үпкэ министиэристибэтэ ол докумуоннары көрбүтүн кэнниттэн, кыбартыыраны 1500000 сыанаҕа ыларга диэн хантараак түһэрсиллибит, ол муниципальнай тэриллии дьаһалтатын балаансатыгар ылыллыбыт.
Ити кэнниттэн Захаров Дьокуускай куоракка бас билиитигэр икки дьиэлээҕин быһыытынан, ити кыбартыыраны бэйэтигэр сурунар бырааба суоҕун үрдүнэн, ылары ситиспит.
Бүгүн, муус устар 8 күнүгэр, баһылык тутуллубут.
Холуобунай дьыала РФ Куттал суох буолуутун федеральнай сулууспатын Саха сиринээҕи управлениетын (УФСБ) бэрэбиэркэтин матырыйаалларыгар олоҕуран тэриллибит.
Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Санатар буоллахха, бу дьыл кулун тутар ыйыгар Чурапчы улууһун баһылыга Андрей Ноговицыны силиэстийэ уорганнара хоруупсуйаҕа уорбалаан туппуттара. Киниэхэ РФ Холуобунай кодексатын 285-с ыст. 2-с чааһынан, ол эбэтэр, дуоһунастаах киһи ымсыы санааттан сулууспатын интэриэһин утары сулууспатын боломуочуйатынан туһаныы бэлиэтэ баарынан, холуобунай дьыала тэриллибитэ.
Биһиги корр., «Саха сирэ» хаһыат, edersaas.ru
Хаартыскалар: ЯСИА, РФ СК Саха сиринээҕи управлениета.