Быйыл сыл саҥатыгар “Сахаэнерго” ААУо Өймөкөөннөөҕү электрическэй тиһигин бас билиитигэр Томпо улууһун түөрт дизельнэй станцията бэриллибитэ.
Өймөкөөннөөҕү РЭС салайааччыта Иннокентий Скрыбыкин иһитиннэрбитинэн, икки бэйэ-бэйэтиттэн ыраах улуустар нэһилиэктэрин электрическэй уотунан ыраах Тымныы полюһуттан – Өймөкөөнтөн быыстала суох хааччыйа олоруох диэтэххэ, уустук дьыала. Ол эрээри биир тэрилтэ буоларынан сибээстээн, Өймөкөөннөөҕү РЭС Томпо улууһунааҕы Развилка, Теплай Ключ, Тополинай уонна Охотскай Перевоз нэһилиэктэрин электричество уотунан хааччыыллыыларын бэйэтин эппиэтинэһигэр ылан олорор. Быйыл сайын ардахтаах буоларын эрдэттэн билэн, кыһыҥҥы массыына суолунан тустаах саппаас чаастары, уматыгы ити ааттаммыт нэһилиэктэргэ тиэйэн кэбиһэн, сайыҥҥы уонна күһүҥҥү кэмҥэ бу нэһилиэктэргэ уот баран, уустук балаһыанньа үөскээбэтэ. Быйыл Тополинайга модульнай ДЭС бастакы уочарата киирдэ, Теплай Ключка 57 уот остуолбатын уларыттылар. Өймөкөөн Сордоннооҕун станциятыгар эргэ дизеллэр оннуларыгар үс аныгы мааркалаах дизель-генераторы туруордулар. Өймөкөөн, Куйдуһун уонна Үчүгэй нэһилиэктэригэр дизельнэй станция уматыгын харайар аҕыс саҥа емкоһы аҕаллылар.
Кэрэхсэбиллээҕэ баар, РЭС салайааччыта Иннокентий Скрыбыкин Өймөкөөн нэһилиэктэрин оҕо саадтарын уонна оскуолаларын кытта ыкса сибээстээхтик үлэлиир. Ол курдук, үлэлээбитин 22 сыл устата оҕо тэрилтэлэринэн сылдьан энергетик идэтин туһунан кэпсиир, билиһиннэрэр, кыахтаах оҕолору анал үөрэххэ туттарсалларыгар өйүүр. Ол түмүгэр РЭС тэрилтэтигэр энергетик идэтин баһылаан, үөрэхтэрин бүтэрэн кэлэн, үгүс ыччат үлэлиир.
— Бэйэм кэлэктииппиттэн түөрт инженери бэйэм туйахпын хатарар салайаччы быһыытынан бэлэмнии сылдьабын, — диэн бэлиэтиир Иннокентий Дмитриевич.
Ити курдук, бүгүҥҥү күҥҥэ Тымныы полюһун 137 энергетигэ бэйэтин идэлээх бырааһынньыгын быйылгы сылга кэккэ ситиһиилээх көрсөр.
Елена ПОТОЦКАЯ.