Өймөкөөҥҥө Магадантан кэлиигэ стационарнай пуун үлэлиир...
Олох-дьаһах

Өймөкөөҥҥө Магадантан кэлиигэ стационарнай пуун үлэлиир

Өймөкөөн улууһун суһал ыстааба иһитиннэрбитинэн, ыам ыйын 22 күнүгэр, улууска өссө 2 киһи коронавирус  сыстыганнаах дьаҥыгар сутуллубута билиннэ.

edersaas.ru

Бу баахтанан көмүс хостооһунугар үлэлии кэлбит дьон. Ити ыалдьыбыттартан биирдэстэрэ, урут ыалдьыбыт киһини кытта хантаактаспыт эбит. Иккис киһи ОРВИ сибикитэ баар буолан, балыыһаҕа эмтэнэ сыппыт.

Өймөкөөн улууһугар уопсайа 12 киһи коронавируска сутуллубута бэлиэтэммит. Онтон 3 киһи үтүөрбүт. 1 киһи ыараханнык ыалдьан, Дьокуускайга ыыппыттар.  7 киһи улуустааҕы киин балыыһа  инфекционнай отделениетыгар эмтэнэр. 1 киһи көмүс хостуур тэрилтэ  производственнай учаастагар амбулаторнай эмтэниигэ сытар.  Ыалдьыбыттар бары баахтанан үлэлээри тастан кэлбит дьон.  Олохтоох нэһилиэнньэттэн коронавирус дьаҥыгар сутуллубут киһи суох.

Өймөкөөн улууһун олохтоохторо: «Халыма» федеральнай трассаҕа Магадан  диэкиттэн массыына субуллан олорор. Онно туох да хонтуруол оҥоһуллубат. Атын эрэгийиэн дьоно ити туһаайыынан кэлэр буолан, сыстыганнаах дьаҥы аҕалаллар«, — диэн айманаллар.

Бу боппуруоһу улуус дьаһалтатын баһылыга Иннокентий Сивцевтэн быһаарарыгар көрдөстүбүт. Онуоха кини санаата маннык:

Муус устар 14  күнүттэн Магадантан киирэр суолга ДПС стационарнай пуунун үлэлэтэбит. Өймөкөөн улууһугар айаннаан киирэр хас биирдии массыына суоппардара, пассажирдара кытаанах бэрэбиэркэни ааһаллар.

Бу стационарнай пуун үлэтинэн хантаактаах дьону булаттаан, стационарга, обсерваторга киллэрдибит.  ДПС пуунугар тута температураларын бэрэбиэркэлииллэр, аадырыстарын, хантан кэлбиттэрин регистрациялаан иһэллэр. Онон «Халыма» трассатыгар Магадантан кэлэр суол туһаайыыта хонтуруолга ылыллыбыта ыраатта. 

Бэйэни салайыныы уорганнара пограничнай эрэгиэйэннэр суолларын, сырыыларын  сабар, бобор, хааччахтыыр боломуочуйабыт суох. Бу федеральнай былаас эрэ быһаарар боппуруоһа. Уус-Ньара аэропордун СӨ Роспотребнадзорун Өймөкөөннөөҕү салаата хонтуруоллуур. Улууска эппиэттээх сулууспалар бэйэ-бэйэлэрин кытта ыкса сибээстээхтик үлэлээн, суһал быһаарыылары ылаллар. 

Сыстыганнаах дьаҥы бохсууга үлэлэһэр бары эппиэттээх сулуупалар бэйэ-бэйэлэрин кытта ыкса сибээстээхтик үлэлииллэрин түмүгэр, Дьокуускай куораттааҕы вирусология  лабораториятыгар 700 анаалыс бэрэбиэркэҕэ барда. Бу, кырдьык, сүҥкэн үлэ түмүгэ!

Бүгүҥҥү күҥҥэ Уус-Ньараҕа:       
✅  34 киһи — дьиэттэн тахсыбакка хааччахтанан (самоизоляция) олорор.
✅  92 киһи — кэтэбилтэн таҕыста.
✅  82 киһи — баахтанан үлэлии  кэлбит оробуочай үлэлиир миэстэлэригэр киирбэккэ-тахсыбакка хааччахтанан олороллор.
✅  178  оробуочай — кэтэбилтэн таҕыста.

35 киһи — обсерваторга сытар.

46 киһи — обсерватортан таҕыста.

7 киһи — провизорнай отделениеҕа сытар.

19 киһи — балыһаттан таҕыста.

3 киһи — улуустааҕы киин балыыһаҕа пульмонология отделениетыгар пневмония диагнозтаах сытар.

Балаһыанньаны улуустааҕы суһал ыстаап кытаанахтык хонтуруоллуур.

Елена ПОТОЦКАЯ, «Саха сирэ» хаһыат, edersaas.ru

Хаартыска: Өймөкөөн улууһун суһал ыстаабыттан

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

4 + 12 =